كلام والسلام.. كلاكيت من أول وجديد 3

بقالي كتير أوي مجتش هنا.. تقريبًا سنتين!

أنا خوفت!.. خوفت لما لاقتني بكتب رسائل بتجسد الآلم اللي مريت بيه

طول عمري بكره كتابة المذكرات للسبب ده نفسه

وبالتالي مشيت وبطلت أكتب الرسائل تاني

لكن طول الوقت حاسة أن في طاقة جوايا محتاجة تخرج بالكتابة 

حتى لو مش بنشرها هنا.

****

مريت بفترة طويلة من بلوك الكتابة اللي بحاول بأقصى ما عندي الفترة دي إني اخرج منه

واللي كان بعده في بلوك قراءة اللي قررت اواجهه بالقراءات الخفيفة السريعة

وحاليًا متجهة للكتب السمعية بشكل أكبر وده بيخليني أنجز أكثر

اللي بيهون إني كمان بقيت بتفرج على دراما مختلفة

ما بين الكوري والأسباني والياباني والأيطالي

والفترة دي من أكثر الفترات اللي بتفرج فيها على دراما بشكل عام

عشان أنا خدت قرار من فترة طويلة اني هواجه كل بلوك بيحصلي بهواية جديدة أعملها

وده بيساعد أني ارجع للي بحبه بالتدريج.

****

في حالة من الانكار بتكون مفيدة جدًا في كتير من الأحيان

لو ذهنك مشغول بحاجة وخاصة لو بتخليك حزين، اعملها بلوك

أعتقد أننا بنكون مستهلكين من التفكير، مش من الحدث نفسه

الحزن والذكريات والحنين والتفكير بيوجع أكثر بكثير من الواقع

ياريت يبقى في زرار نقدر ندوس عليه عشان كل ده يختفي ويفضل الواقع اللي عايشنه
اللي هو بنسبة كبيرة أهون من كل ده

****

بعد الكلام اللي فوق ده.. أنا شخص للأسف ذاكرته قوية

بفتكر كل حاجة بالتفصيل وكأنها صورة أو فيديو قدامي والكلام مسموع في ودني

وبالتالي تنفيذ الكلام ده بيكون صعب جدًا بالنسبة لي

بس السنين اللي فاتت علمتني حاجة.. اغلوش على دماغي :D

لما بلاقي دماغي بدأت تضايقني وتفكر بزيادة أو تحن بزيادة، بقول أي حاجة تشغلني

بقرأ أدعية، بقول حسبي الله ونعم الوكيل، بسبح، بقول قرآن حفظاه

بحاول أسمع كتاب، بفكر في نص أكتبه واستغل التفكير فيه

بحاول دايمًا وأبدًا، ولا أنكر أني أوقات بفشل وأوقات بنجح

 بس النتيجة تستحق المحاولة.