شعور الامتنان من أجمل المشاعر اللي ممكن الواحد يقدمها أو يستقبلها من الأشخاص اللي قدامه وفي حياته
الامتنان على أقل التصرفات أو الأحداث بيخلي ليها معنى
سواء ليك أو الشخص اللي بتكون ممتن ليه
لو شكرت أي حد على أي حاجة بتفرق معاه فعلًا
حتى في التفاصيل اليومية المعتادة من ركوب مواصلات أو شراء احتياجات
كلمة شكر للأشخاص اللي بتقدملك الخدمات دي بتفرق فعلًا معاهم
تخيل بقى لما تكون ممتن لنفسك والأشخاص في حياتك هيكون فارق والا لا
حاول تظهر شعور الامتنان والشكر ده للأشخاص القريبين منك
عشان وقت ما يروحوا ما تزعلش وتندم انك مقدمتش ليهم اللي يستحقوه.
*****
اوقات كتير بكون ممتنة لنفسي مش غرور لكن من واقع كتير مريت بيه
أن كان في مواقف كتيرة الواحد كان ممكن بسهولة يغلط فيها ولكنه أختار الصح
دايمًا الغلط بيكون أسهل وشكله وشعوره -وقتها- أجمل
لكن لما اخلاقك توقفك وتقولك أنت مش كدة
وقتها بتعرف أن حتى الغلط اللي شكله حلو ده دلوقتي عواقبه وحشة أوي بعدين.
****
الفترة اللي فاتت ظهر في حياتي اصحاب كتير جداد
مختلفين وممتعين وحلوين وبيفرحوا القلب حرفيًا
فيهم مني كتير وكأنهم بيتكلموا من جوايا
لما بنتقابل بحس إننا نعرف بعض من زمان أوي
اليوم من غيرهم ناقص حاجة كبيرة
دي بقى هي طاقة النور اللي ربنا بيخبيها في وسط الحاجات اللي بنخاف منها
أنا كنت خايفة أخد الكورس ده تحديدًا وبعدين ربنا كتبلي أخده عشان أقابل اصحابي دول
كل يوم بقولهم شكرًا لأنكم معايا
شكرًا لأنكم بتحلو الحياة زيادة بوجودكم ♥
****
ممتنة لوجود ولادي، عشان هما دافع كبير أوي ليا أنى أكون أحسن عشانهم
ولأنهم بيخلوا للحياة طعم مختلف وأحلى من أي وقت
وكل ما ببص ليهم أو بشوفهم بيعملوا حاجة جديدة أو بضحك بسببهم
بقول الحمدالله على وجودهم ♥
****
لما تبقى عارف إنك لما تقع هتلاقي اللي يسندك
ولما تبقى عارف إنك وقت ما تحب تتكلم وتزعق وتخرج كل الطاقة اللي جواك هتلاقي اللي يسمعك
ولما تبقى عارف أن في حد بيكافح بكل قوته عشان تفضل معاه
ولما تبقى عارف أن في حد أنت دايمًا اختياره الأول
ولما تبقى عارف أن في حد بيفهمك من غير ما تتكلم أو تحاول تشرح اللي جواك
ولما تبقى عارف أن مهما كنت مضايق فدايمًا في حاجات حلوة في الحياة تستاهل نقولها شكرًا
فعشان كدة.. شكرًا ليك لأنك هنا ومعايا ♥
****
ممتنة جدًا لأهلى اللي قدروا يخلوني الشخصية دي دلوقتي بكل حلوها ومرها ولغبطتها
كنت أتمنى الوقت يسمحلي أقدملهم شعوري ده دلوقتي على أرض الواقع
لكن متأكدة إنهم حاسيين بكل مرة بشكرهم فيها من قلبي ♥
.jfif)
