10 سنين مودة ورحمة وحب ♥

في اوقات كدة بتعدي على الواحد مش عارف عدت ازاي 

من كتر ما هي بسيطة وسريعة وجميلة

فإزاى عدى 10 سنين علينا في بيت واحد؟

على الرغم من أن في تفاصيل وحياة بينا قبلها

 لكن الحياة في بيت واحد مختلفة تمامًا عن أي ارتباط أو خطوبة

كانوا 10 سنين فيهم تفاهم ومودة ورحمة وحب 

وذكريات كتير حلوة وتفاصيل بنخلقها مع بعض

زي ما فيهم خناق وزعل ونقاشات واختلافات بتقوي العلاقة وبتخلينا نقرب من بعض أكثر

فكرة أنك تعيش في بيت واحد مع انسان طباعه مختلفة عنك
وحياته قبلك مختلفة عن حياتك، هي فكرة مش سهلة

وكانت فكرة -قبل ما اعرفك- اصلًا صعبة جدًا بالنسبة لي

عشان كدة مكنتش متخيلة أني هلاقي شخص يغير شعوري ده 

حتى لو في حب.. 

الحب لوحده مش هو السبب أن الناس تكمل مع بعض العمر كله

عشان في خانات كتير أوي لازم تكون مليانة مش فاضية

منها وأهمهم خانة التفاهم والتقدير، وانك تعرف ازاي تحتوي اللي قدامك

 وإزاي اصلًا تعرفه أنك بتحبه بالفعل مش بالكلام، وتخليه متأكد من كدة مهما حصل

إزاي تقدروا تتبسطوا مع بعض حتى لو بأقل الأسباب والإمكانيات

إزاي أقل ذكرى بينكم ليها معنى كبير

وكل كلمة بتزيد بينكم المحبة والمودة

إزاي بينكم رحمة كبيرة حتى في وقت الخصام

بالنسبالي 10 سنين فترة مش قصيرة

 عدت خفيفة وحنينة على القلب أوي

مريت فيهم بحاجات كتير قاسية خلتني مختلفة وحاجات حلوة خلتني أحسن

لكن في وسط كل ده......

قلبك كان دايمًا هو القلب الحنين الدافئ اللي بيحتوي اختلافي وعصبيتي ونفسيتي

وعقلك كان عقل ناضج بيحتوي طموحي واحلامي وبتشجعني على تحقيقها

فكفاية بالنسبة لي كلمة "الحمدالله" اللي بسمعها منك برضا أوي لما بتركز في تفاصيل حياتنا وولادنا

واللي بتعرفني أن حبنا كان صح وأننا كنا مكتوبين لبعض وحياتنا دي كانت هي نصيبنا

كنت أنت الصدفة الأجمل على الأطلاق

شكرًا لأن الحياة بينا كانت مشاركة في الحب والمسئوليات والأهتمامات والقرارات

شكرًا لأنك كنت سند ليا في كل موقف بعدي بيه
شكرًا لأنك كنت صديق بتسمعني مهما كنت مشغول 

شكرًا لأنك كنت الأمان في كل مرة بجري عليك لما بيحصلي حاجة

شكرًا لانك كنت الحضن اللي ببكي فيه وقت كل وجع وفقد

لما سألتك: حسيت إنهم كتير كدة؟
قولتلي.. "أبدًا مع أن فيهم ذكريات حلوة يكفوا قد الـ 10 سنين دول مرتين كمان"

عشان إحنا بنعيش بذكرياتنا وتفاصيلنا اللي بنخلقها لنفسنا واللي كتير مش بيفهموها

فأنا بحب تفاصيلنا وحياتنا وذكرياتنا اللي عملناها واللي لسه هنعملها

ربنا يثبتها ويثبتنا ويجعلها دايمة لـ 100 سنة جاية كمان اللهم آمين

كل سنة وأنت هنا وفي القلب ♥، وكل سنة وأنا في قلبك♥

readmore »»

كلام والسلام.. كلاكيت من أول وجديد 4

 

مقتنعة تمامًا أن مفيش حد في الدنيا واخد كل حاجة

مفيش أي حد نصيبه كامل في كل جانب من جوانب حياتنا

في اللي ربنا كرمه بالفلوس وفي اللي ربنا كرمه بالأهل

وفي اللي ربنا كرمه ببناء أسرة وشريك وأولاد

وفي اللي ربنا كرمه بالأخوات أو الأصحاب

لو بصيت على حياتك هتلاقي كرم ربنا باين في حاجات كتير

لكن لو نفسك مش راضية.. دايمًا هتشوف حتة النقص اللي في حياتك

ودي أسوأ حاجة ممكن الشخص يحس بيها.. شعور عدم الرضا

متشوفش نفسك مظلوم عشان أنت واخد حقك 24 قيراط متقسم على كل حياتك

مهما كنت شايف أن في حاجات مينفعش حاجات تانية تعوضها

اتعلم بس ترضى عشان ربنا قال "وخلقنا الإنسان في كبد"

فمفيش حد هياخد الـ 24 قيراط دول في كل حاجة في حياته

الرضا هيخليك تشوف حياتك أحلى مهما كانت ناقصها حاجات.

****

مواقف كتير بتمر في حياتي بتأكد معاها أن ربنا بيحبني

مهما كنت مقصرة في قربه وفروضي لكن بيقولي أنه بيحبني
لما يحميني ويبعدني عن حاجة مش في صالحي

ولما يكون نفسي في حاجة وتحصل بنفس ما هي في دماغي

ولما أحلم بأحداث معرفهاش وكأني شايفاها قدامي وأعرف انها حصلت فعلًا

ولما احلامي اللي لسه محصلتش تحصل في الواقع حقيقي
حتى لما بحلم أو بتوقع السيئ وبيحصل فهو بيكون خير بردو

ولما بلاقي كل حاجة بتروح ربنا بيعوضني عنها بأحسن مما دعيت وأتمنيت

ولما بخسر أي شخص بيعوضني بغيره كتير وكتير بيحلوا الحياة بوجودهم

ده كله بيخليني اعرف أن ربنا اداني شفافية راضية بيها وعارفة إنها رسالة ليا

وبعرف أن جوايا حاجة كويسة وتستاهل ربنا شايفها فيا 

وأنه بيختارلي الأحسن عشان يعوضني ويراضيني.. فالحمدالله دائمًا وأبدًا.

****

لما بتحصل مشكلة مع شخص في حياتنا وخاصة لو شخص قريب مننا..بنزعل جدًا

بس أوقات كتير ربنا بيقدر أن المشكلة دي تحديدًا تحصل عشان تكون سبب أن علاقتكم تكون أحسن

وتشوفوا العلاقة دي بصورة مختلفة وشعور مختلف

في مشاكل بتكون خيرها أكبر بكتير من شرها

حتى لو مقدرتش تشوف ده في وقت المشكلة نفسه

بس ربنا عمره ما بيقدر لينا حاجة وحشة أبدًا.

****

الإنسان اللي بيكون شخصية قدام الناس وشخصية مختلفة مع نفسه أو في السر ده بيصعب عليا أوي

قبل كدة قولت الجملتين دول في مدونة الحوليات

ويوم عن يوم بتأكد منهم، في أشخاص بيحبوا أوي يظهروا قدام اللي حواليهم أنهم ملايكة

لكن من جواهم فيه شر وحقد وغل أوقات بيسيطر عليهم

بسأل بقى نفسي هما إزاي بيقدروا يعيشوا مع تمثيلهم ده عادي بجد؟!
خليك متسق مع نفسك.. اللي بيظهر للناس هو فعلًا اللي جواك مهما كان جواك ايه

عشان ربنا اللي فوق الناس عارف أنت بتعمل ايه وأنت لوحدك، ونيتك فيها ايه

****

أنا شخص معترف أني بغلط وبقصر وفيا جزء شرير احيانًا كمان عشان أنا إنسان

فضيلة الأعتراف أنك بتخطأ وبتكون شرير أحيانًا

أفضل بكتير من رزيلة تمثيل أنك ملاك ومبتغلطش، عشان مفيش ملايكة على الأرض.

****

المهم أن مفيش حد دايمًا شرير
ومفيش حد دايمًا ملاك 
الخلطة دي اللي بتخليك إنسان.

readmore »»

8 سنين من النور ♥

 

أنا لحد دلوقتي مش متخيلة أن عدوا 8 سنين على وجودك

و8 سنين على النور اللي نور حياتنا وخلاها أحلى

و8 سنين من الحب والمناهدة واللعب والعند والحنية والمناقشات اللي مش بتخلص

و8 سنين على بداية كل حاجة حلوة بدأت

وجودك كان هو الفرق في كل حياتنا وخلانا نشوف كل حاجة حلوة بيك

كل سنة بشوف فيك حاجة مختلفة بتزيد أو تقل

شخصيتك مستقلة ومختلفة ودماغك كبيرة وبتهتم بمواضيع غير أي حد في سنك

اهتماماتك كل يوم بتزيد وأفكارك بتختلف وبتكبر أكتر من عمرك

ببقى فرحانة أوي وأنا عارفة أنك ذكي وشاطر اللهم بارك وعندك قدرة كبيرة على كل حاجة بتعلمها

وفرحانة بشخصيتك اللي بتبنيها حتى وأن كان في حاجات بتضايقني بس ده حقك

لكن بخاف أوي من بكرة...

بخاف أن شخصيتك دي متعرفش تتأقلم بسهولة مع كل الحاجات اللي بتضايقك ومش متعود عليها

بخاف من بكرة تكون الحياة قاسية عليك عشان عارفة أنك حساس جدًا
لكن كل اللي هقدر اعمله اني اتعلم اساعدك ازاي وافضل جنبك وقت ما تحتاجني

وأني احبك بشكل غير مشروط أبدًا

كل سنة من عمرك أنت بتكون فيها بطريقة جديدة واسلوب جديد وافكار ومعلومات جديدة

بتمنى تكون في كل سنة جاية نسخة أحسن من اللي أنت بتحاول تخلقه لنفسك

بتمنى تكون دايمًا واثق من نفسك وقدراتك وشايف نفسك تستحق الأفضل عشان دي الحقيقة

كل سنة وأنت طيب ياروحي وبتمنى تكون دايمًا جميل ونور زي ما أنت ♥

readmore »»

رنين..

استيقظ يوميًا في موعدي المعتاد
أظل اتقلب في سريري وبعد مرور دقائق فقط أجد هاتفي يرن

انظر إلى الرقم الذي يظهر أمامي والذي كنت تناسيته منذ فترة

تسرقني دقائق من الدهشة.. بعدها أقلب الهاتف للجهة الأخرى حتى لا يواجهني رقمك
في اليوم التالي تأخرت عن موعد استيقاظي.. ربما عمدًا
افقتُ على ذبذبات هاتفي

على الرغم من أنني اقوم بوضعه على نظام الأهتزازات حتى لا استيقظ على رنينه

إلا إن ذبذبات شوقك ايقظتني فوجدت رقمك اليوم أيضًا

ظللت واجمة أمامه، كيف أمكنك وبكل جرأة أن توقظني من أحلامي بعد أن قتلتها مسبقًا؟!
كيف أمكنك تذكر رقم هاتفي الآن؟!

أنا التي كان رقمي يظهر على هاتفك يوميًا ولمدة عام ولم تجيبني قط!

بعد أن انتهت الرنة الأولى وجدت الرنين يعاد من البداية ثانية، وأنا ظللت واجمة كما أنا

وضعت الهاتف مقلوبًا مرة أخرى، واستيقظت لأبدأ يومي بعيدًا عنك

بعد عدة أيام تالية يظل رقمك يظهر ويختفي كل يوم صباحًا

كيف مازلت تتذكر موعد استيقاظي ونومي؟

كيف تتذكر أيام عملي وأجازاتي؟

هل قتلك الشوق إلىّ الآن؟!

أقتل شوقي إليك في كل مرة تهاتفني فيها

وأبعد يدي مرغمة حتى لا أجيبك

ربما يغادرك شوقك إليَ، كما غادرني شوقي إليك يومًا ما.. وبلا عودة.

readmore »»

مسودة

 "كان في حد  قالي فوقي بسرعة لأني قعدت 5 سنين بعد وفاة والدي مش مصدقة

مجاش في بالي إني هكون في حالة الإنكار دي بالفعل!

بعد مرور سنتين بالكامل أنا لسة في حالة إنكار بحاول اتخطاها

بتمر اوقات كتير بمسك التليفون وهتصل بيكي

لو في أي جديد في حياتي ببقي عايزة اكلمك اخد رأيك

لما بيحصل أي موقف ببقي عايزة أجري عشان أحكيلك زي ما كنت بعمل، أنا وحشني هزارنا أوي

بيتهيألي كنتي أكتر حد لو أنا نار من جوايا بسبب أي موقف بتهديني بكلمتين مش عارفة أزاي!

انتي متخيلة أني بقيت أكره المناسبات بسبب أنك مش بتقوليلي كل سنة وأنتي طيبة!

لية في ذكريات كتير بتتكون وأنتي مش موجودة فيها

لية ابني الصغير يكبر ويطلع مش عارفك الا من الصور

لية ابني الكبير اتكون في دماغة فكرة أن كلنا هنروح عند ربنا لما نكبر زي تيته

وبقى خايف إننا مش هنكون معاه هو واخوه لما يكبروا

أول مرة أحس بالألم اللي بيوجع القلب أوي ده لدرجة أني مبقدرش اتنفس أوقات كتير

الوجع اللي كأن حرفيًا في جمرة من النار محطوطة فوق قلبي

وجع بحاول ادارية طول الوقت لكن حالة الإنكار دي اللي بتسيطر عليا في أوقات كتير

اتمني أن الإنكار ده ميفقدنيش توازني في يوم من الأيام

لان وجودك هو اللي كان عامل توازن لحياتي بعد موت بابا وموت تيتة تحديدًا

وكأني بسترجع كل الوجع اللي عديته من 12 سنة لحد دلوقتي"

*****

الكلام ده لاقيته مسودة هنا من سنة فاتت!

منشرتوش وقتها لأني كنت وصلت لمرحلة اني واخده بالي أني هقع

كنت واخده بالي أن الأيام ماشية بس أنا من جوايا واقفة

واخده بالي اني مضايقة وعصبية ومش عارفة أكون مبسوطة
واخده بالي أني بخسر كتير وبسيب فرصة لناس تدخل في حياتي تبوظها

ناس انتهزت فرصة اني ضعيفة وحزينة عشان تاخد مساحة في محيط حياتي متستحقهاش

وتسرق تفاصيل وحياة حلوة تعبت أوي عشان أعملها

وقتها عرفت أن ماما عمرها ما كانت هتبقى مبسوطة باللي أنا فيه

وكنت بشوفها في أحلامي كتير وهي مبسوطة وبتضحك وده كان بيطمني وبيدخل السكينة في قلبي

وكانت بتقولي خلي بالك من نفسك

اخر حلم لما قالتلي خلي دي في ودنك وخلي بالك منها أوي وضغطت عليها

حسيت انها بتقولي رسالة فوقي وخلي بالك من حياتك

حياتي اللي أنا عارفة إنها كانت من أهم أولوياتها

وعشان كدة قررت أفوق.. آه لسة بحس بالوجع وآه لسه بقول عايزة اكلمها

بس دايمًا هي قدامي، في تفكيري، وفي كل قرار باخده

دايمًا شايفة هي هتكون مبسوطة مني دلوقتي والا زعلانة مني أو عليا

فعشان كدة أنا قررت اني مش هخليها تزعل مني لأني متأكدة إنها بتحس بكل حاجة بمر بيها

بحاول بأقصى ما عندي معيطش لما بروح أزورها
عشان مربطش في دماغ ولادي أن مكانها الجديد كله عياط

خصوصًا انهم بيحبوا يروحولها ويقعدوا يقرأولها قرآن

 وببقى متأكدة إنها حاسة بيهم
ازاي هي تكون مبسوطة بوجودنا وأنا اعيط وازعلها؟!
النهاردة عدى 3 سنين وهي في مكان أجمل من هنا

مازلت محتاجاها في حياتي وناقصني كتير من غيرها
مفتقدة وجودها في تفاصيل يومي وكلامنا وهزارنا وخروجاتنا ورغينا

بس دي حاجة مستحيل هقدر أغيرها فلازم أتاقلم معاها

فيارب ألهمني السكينة والرضا بكل ما قدرته لي

وترزق أمي الجنة بحق تعبها وآلمها وبحق رحمتك التي وسعت كل شيء

وتجعل قبرها روضة من رياض الجنة اللهم آمين

readmore »»