رسائل ربنا ❤

أنا مقتنعة جدًااا برسايل ربنا
ربنا اداني نعمة كبيرة اني اقدر اشوف رسايلي
في كلمة في صورة في مكالمة في موقف
كل مرة كنت بقول فيها يارب، يارب عرفني الصح فين
ماكنش بيمر وقت يُذكر إلا وبلاقي رسالتي وصلالي زي ما ربنا عايزها بالظبط

وتعرفني أني صح فعلًا

فاكرة أني في مرة قبل ما أنام قولت على حاجة معينة يارب بلاش ده

عشان أصحى تاني يوم على تليفون فيه بالظبط كل اللي دعيت ربنا بيه

وبتخطيطه وترتيبه هو بدون أي تدخل مني

ويمكن أحسن مما دعيت كمان

******

من فترة كتبت على الفيس اني بشوف كتير جدًا بالصدفة صور عليها
"ولسوف يعطيك ربك فترضى"

وبقيت مقتنعة أن دي رسالة ربنا ليا فعلًا

من قريب صديقة قالتلي اقرأي سورة معينة من القرآن قبل ما تنامي
قرأتها ونمت، وصحيت تاني يوم "ولسوف يعطيك ربك فترضى" بتتردد في ودني

عشان بعدها بثواني افتح الانستجرام الاقي حد بقاله سنة مبعتليش أي رسالة
بعتلي فيديو فيه السورة دي تحديدًا

شكرًا يارب على كل حاجة حلوة بتحصل
وشكرًا على كل رسالة بتبعتهالي تطمني

والأهم شكرًا أني قادرة اقرأ وأشوف رسايلي وافهمها

******

احلامي من ضمن رسايلي ويمكن أهمها

عشان كل مرة بقول لا يمكن يكون مش صح يمكن يكون مجرد حلم

بيطلع هو اللي صح وأنا اللي غلط

احلامي من ضمن رسايلي لدرجة أني أوقات بخاف منها

وأوقات كتير بتغيير مودي كمان وبتخليني مضايقة

عشان بكون عارفة أن اللي فيها حقيقي سواء حصل أو هيحصل

وأوقات بتخليني مبسوطة عشان بتقولي أن في خير جاي

******

 

الفترة دي في بوستات كتير بتتكلم عن مصطفى حسنى

وأنه قد أيه رحيم وسلس في تعليمه للدين وبطريقة مبسطة وتحبب اللي قدامه في الطاعة

كتير ببقى عايزة أكتب عن تأثير مصطفى حسني تحديدًا فيا

من زمان وأنا بحب أشوف برامجه واسمعه وحضرتله مرة ندوة

لكن في الكام سنة اللي فاتوا مصطفى حسنى بالنسبة لي مبقاش مجرد داعية

أو حتى شيخ اسمعه وافهم منه اللي مش فاهمها في الدين

لكنه كان من ضمن اللي ربنا بعته ليا عشان يهون عليا الصعب

كأنه كان أخ بكل ما في الكلمة من دعم وقرب ومحبة

كلامه كان حنين جدًا عن فكرة فقد الأهل وإزاي هما حاسين بينا

وإزاي أن من حقنا نزعل عليهم قوي لدرجة الألم الداخلي اللي بنحسه ده

وكان دايمًا بيقول كلام بيهون عليا كتير وأدعية بتريح قلبي

حتى أني كنت بحتفظ بفيديوهات كتير ليه برجعلها كل شوية

في فترة ما أنا كنت عايشة تقريبًا على الأكونت بتاعة وبشوف كل الفيديوهات واللايف

ودلوقتي كل ما بيكون في موضوع معين في دماغي

سبحان الله بلاقي بالصدفة قدامي فيديو بيتكلم هو فيه عن نفس النقطة دي

ربنا يجعل كل عمله في ميزان حسناته

وكل مرة كلامه ليا أو لغيري هون الوجع أو قرب قلبنا من الطاعة أكتر في ميزان حسناته

******

ربنا الفترة دي مديني راحة نفسية كبيرة أوي بحمده عليها

وهي أهم شيء بالنسبة لي

بيخليني مزعلش على أي حاجة بتروح مهما كانت

بقبل كل الخطط اللي بيرسمها لي عشان عارفة إنها هي الأفضل ليا

محيطي هادي وجميل وبيساعدني انجز واحقق كل اللي بحلم بيه ودي نعمة كبيرة

قلبي راضي وبيحب وبيهون على نفسه أي شيء

كل ما عقلي بيخوفني أو قلبي بيوجعني من أي ذكرى

بلاقي في نفس اللحظة موقف يقولي لا فوقي 

متستسلميش للشيطان اللي عايز يضيع عليكي اللحظات الحلوة اللي انتي عايشاها دلوقتي

فالحمدالله دائمًا وابدًا

******

بقالي كذا سنة رمضان بيكون شهر مؤلم جدًا بالنسبة لي

وده كان سايب شعور جوايا أنا مش حاباه أبدًا

لكن السنادي الوضع مختلف تمامًا الحمدالله

هادي وسلس وحنين أوي على قلبي

ربنا مطمن قلبي وبيهون عليا الفقد

وأنا قادرة التزم بوردي وفروضي بشكل أكبر بكتير

وده كله بيخليني راضية وهادية ومرتاحة أكتر

ربنا يديمها نعمة

وربنا يديم رسايلة الجميلة ليا

ويديم نعمة القدرة على قراءة الرسايل دي

readmore »»

عن أثر المدونة والكتابة 💙

 

لما بقلب في المدونة هنا من سنين كتيرة فاتت بلاقي حياتي كلها هنا

تفاصيل كتير اوي مريت بيها، حزن وفرح ونجاح وذكريات وتفاصيل

فضفضة كانت من القلب أوي ومن غير أي رتوش

جنان خام مش عارفة كانت الناس مستحملاه ازاي 😤

تفاصيل كتير بحبها اتكلمت عنها لسة موجودة، وتفاصيل تانية اختفت

ناس كتير فضلوا قريبين وناس تانية اختفت وناس جديدة قربت
لما بقرأ كل بوست بفتكر الموقف اللي كتبته فيه بتفاصيله
بفتكر كنت بتكلم عن مين في كل حاجة كتبتها حتى لو ماذكرتش أسامي
لكني فاكرة.. وهفضل فاكره
وممتنة جدًا للحياة الحلوة اللي عشتها واللي دونتها هنا عشان افتكرها دايمًا

حياة اختلفت فيها حاجات كتير
 لكن بالرغم من ده في جزء من روحي لسة زي ما هو وجزء تاني اختلف

كل اللي بمر بيه ساب بصمة ملحوظة عليا أنا نفسي شايفاها

ولسة هعمل ذكريات تاني وهكتب هنا ويارب ماوقفش أبدًا عن ده

عشان أنا كل ما بقرأ اللي كتبته زمان بكون مبسوطة وفي بسمة على وشي

بتعرفني أن عشت حياة سعيدة بكل تفاصيلها مهما كنت شوفتها وقتها حزينة

لكن الحمدالله على كل حاجة حلوة الواحد مر بيها وكل حاجة بتوجع أتعلم منها.

****

الحقيقة أني متفاجأة من أني رجعت اكتب هنا بانتظام إلى حد ما

أنا بصحى الاقي حاجة في دماغي عايزة اكتبها بدخل هنا
بسيب أكتر من مسودة لأكتر من فكرة أو خاطر في دماغي
 مبفكرش أنا بكتب ليه ولمين

عارفة أني بكتب لنفسي وده سبب كافي جدًا وهو السبب الأهم

 وده نفس اللي كنت بعمله زمان هنا (فيارب دماغ وشوية من فراغ زمان 😃)

بكتب عشان أفكر نفسي أن زي ما عدى الوحش فأي وحش هيعدي وهيجي الحلو

"كل مر سيمر"

بكتب عشان الحلو يستاهل جدًا يتوثق

وافكاري مهما كانت مكركبة تستاهل تتوثق

عشان لما أرتب الكركبة دي أكون ممتنة لنفسي.

****

مفتقدة زحمة البلوج بتاعة زمان مش عشان حد يتابعني أو كومنتات

لكن عشان كان في هنا حياة بكل معنى الكلمة وناس كتير أنت عايش معاهم تفاصيلهم

وحشتني الحياة اللي كانت هنا.

*****

عمري ما اعتبرت الفيس بوك من أول ما ظهر بديل عن المدونة

لأني معظم اللي بكتبه هنا مش هفكر أبدًا أكتبه هناك

هنا المخبأ السري بتاعي، اللي بحبه وبفضفض فيه زي ما أنا عايزة

وكل الكلام عن المدونة ده فكرني لما كنت بعملها عيد ميلاد زمان

بيتهيألي أنه كان في شهر 3 من كل سنة بحتفل بوجود البلوج مساحتي السرية الصغيرة 

شباب بقى ما احنا كنا شباب 😄

*****

الفترة دي بيوصلني ريفيوهات كتير عن أخر كتاب ليا وكمان كتبي القديمة
اللهم لك الحمد دائمًا وأبدًا

لكن أكتر ريفيو أنا حقيقي طايرة من الفرحة بيه كان مفاجئ وغير متوقع من الكاتبة نورا ناجي

اللي بعتتلي رسالة تقولي أنا قرأت بريق باهت ومبسوطة بيكي أوي

حقيقي كنت بتنطط من الفرحة حرفيًا
 لأني حتى ماكنتش أعرف أنها مهتمة بالكتاب وجابته
 رأيها فرق معايا جدًاااا وقولتلها كدة

شكرًا للناس اللي بتوزع محبة ونقاء

شكرًا للناس اللي بتدينا دافع نكمل من غير ما يحسوا

شكرًا لكل حاجة حلوة وعوض ربنا ورسائله اللي بتقولي كملي انتي تستاهلي حاجات حلوة كتير

*****

معرض الكتاب السنادي كان مبهج بشكل مش معقول، وكنت مبسوطة بيه أوي
نزلته أكتر من مرة وشوفت ناس كتير
منهم اللي افتكرت اتصور معاهم ومنهم اللي نسيت من كتر ما الكلام اخدنا
قابلت ناس بقالي سنين ماشوفتهمش
قابلت ناس أول مرة أشوفهم
حتى لما كنت بلف لوحدي كنت ببقى مبسوطة
نزلت مع مازن كالعادة وجبنا كتب حلوة لينا كلنا
حضرت لقاء ونس الكتب اللي كان يوم مليان بالمحبة واللطف والكتب
الذكريات والروح دي كانت وحشاني جدًا وكنت مفتقداهم السنتين اللي فاتوا
فيارب يديم كل اللحظات الحلوة دي على طول

*****

من فترة صحيت في يوم لاقيت رسالة من صديق عزيز في مجال الكتابة
كان بيقولي أنه في أسلوب معين في الكتابة كان شايف أن الجملة مش هتمشي بيه
لكن مرة قرأ لي مجموعة قصصية وكنت بكتب بالأسلوب ده
وشاف أن الموضوع كويس أهو وسلس في القراءة ومفيش مشكلة
ومن وقتها وهو اتبع الطريقة دي وبيكتب بيها في كل شغله والموضوع تمام
وفكر أنه واجب يبعتلي يشكرني على النقطة دي
فرحت جدًا بالرسالة دي وشكرته وقولته أنه صنع يومي وقتها فعلًا
الكتابة طاقة نور وإحنا بنكتب لعلنا نحدث أثرًا في الوقت الحالي
 أو حتى نترك أثر طيب بعد ما نمشي
رسالته دي حسستني أني تركت أثر حقيقي قبل ما أمشي حتى لو بسيط

*****

نفس الصديق لما قرأ أخر حاجة بكتبها قالي أنا صقفت
واتمنى أرجع بحاجة بنفس القوة دي
وده بالنسبة لي كلام عظيم جدًا جدًا فوق الوصف
وسبب في سعادة مقدرتش احددها بكلام
أنا ممتنة جدًا للقلوب الطيبة اللي بتقدر تقدم دعم ومحبة خالصة واقتراحات كمان عشان تكون أحسن

*****

صديقة عزيزة جدًا من قريب سألتني.. مبسوطة إنك رجعتي تكتبي؟

قولتلها أنا مبطلتش كتابة بصورة أو باخرى، لكن كنت بكتب لنفسي

قالتلي أنا مش عايزاكي تكتبي لنفسك بس تاني أكتبي وانشري اللي بتكتبيه

نفس الصديقة قالتلي كتابتك حلوة ومفرداتك قوية

وده رأي أنا بعتز بيه جدًاااا وبيدعمني وبيقويني إني أكمل

*****

كل كلمة بتتقالي بحفظها في دماغي وعمري ما بنساها
عشان لو نسيت دماغي هتقولي فوقي يادينا وافتكري كل كلمة اتقالت ليكي
عشان أكون دايمًا مقدرة الأشخاص الطيبين اللي ربنا بيبعتهم في طريقي

*****

الفترة دي بكتب مراجعات كتير للكتب اللي بقرأها واللي عددها زاد الحمدالله

أكتر من رسالة وصلتني من أصدقاء ليا إني كنت سبب في أنهم يرجعوا يقرأو ويشتركوا في تطبيقات للكتب

كنت سعيدة جدًا جدًا إني سبب في أن حد يرجع يقرأ تاني
عشان ده من ضمن الأثر اللي الواحد بيحاول يسيبه

ولأني كنت محتاجة الدعم ده والدفعة دي في فترة ما في حياتي، فعارفة هي قد أيه بتفرق

*****

لما بكتب تحديدًا مشروع أدبي بحضر له
بحس أن في روح جوايا هي اللي بتطلع
أوقات بخلص اللي بكتبه وبقعد أقرأ واراجع وأقول هو أنا كتبت ده إزاي؟
في كل كتاب خلصته توقعت أني بعده مش هعرف أكتب تاني
كنت بخلصه وأنا مستنزفة حرفيًا من جوايا
وكأني خلصت كل الثقل اللي كان بيملاني.. فبقيت أخف
لكن الروح بترجع تتملي تاني بتفاصيل ومواقف ومشاعر محتاجة تخرج
فبيرجع الحلم يبدأ من أول وجديد
عندي حلم جديد مهم جدًا بالنسبة ليا
كان مستحوذ عليا بقاله سنين ودلوقتي بس قرر يخرج ويكمل
فياااارب كمله على خير واكتبله يشوف النور

*****

قارئي الأول والأهم
مهما كنت بسمع من أراء كويسة فهيفضل رأيك هو الأقرب لقلبي
كل حاجة كنت بكتبها كنت بتبقى أنت أول حد يقرأها
كنت بتبقى ناقد قاسي عشان تخليني أحسن
بالرغم من أنك مشغول لكن قدرت تلاقي وقت عشان تقرأ اللي بكتبه
أنك تقولي اني شاطرة وتطورت كتير وانك مبسوط بيا
فـ دي اكتر حاجة فرحتني في كل اللي اتقالي عن شغلي ده
أنا ممتنة ليك ولحبك ووقتك واهتمامك 💙

readmore »»

عيد ميلاد

 

دايمًا شايفة أن الذكريات مهمة أوي في حياتنا

هي اللي بتخلينا شايفين كل سنين عمرنا اللي فات في شكل صور في عقلنا

حتى لو مش صور بالمعنى الحرفي المعروف

على الرغم من إنها بتخلينا نشوف أننا كنا في أوقات مبسوطين من قلبنا حقيقي

لكن في الوقت نفسه مع كل فقد بترجع الذكريات دي عشان توجعنا حتى لو في البداية بس

وبعد كدة بنرجع نشوفها بنفس الفكرة الأولى وإنها كانت وقت جميل قضيناه مع الناس اللي بنحبهم

وهي دي الذكريات والسيرة الحلوة اللي بيسبوها لينا عشان تصبرنا

أعتقد أني من بعد وفاة ماما بقيت بشوف كل حاجة بنظرة مختلفة

ومنها فكرة الذكريات

الفترة اللي فاتت دايمًا بفتكر موقفين تحديدًا مع حمايا

الموقف الأول بعد ما اتجوزت بشهر ونص تقريبا كان عيد ميلاد حمايا

خدنا تورته وروحنا ليهم وكنت واقفه في المطبخ بقطع التورته بعد ما هيصنا شوية

سمعته بيقول "البت دي جدعة أوي"

سمعتها رغم أنه مقصدش يسمعهالي وأنا عمري ما نسيت الكلمة دي

مرت مواقف كتير طول العشر سنين اللي فضلت فيهم موجودة في البيت ده

مواقف عرفتني أنه بيحبني وبيقدرني وبيعاملني أني بنته فعلًا

وعشان كدة أنا شايفة أن المواقف الأولى دايمًا بتدوم

الموقف التاني كان قبل وفاته بشهر بالظبط كان أخر عيد ميلاد له

جوزي اقترح عليا أني اعمله تورتة عيد ميلاده بنفسي وأنا حبيت الفكرة فقولتله يلا بينا

وفعلًا أخترنا شكل التورتة وبدأنا نجهز فيها ونعملها مع بعض

وخدناها وروحنا، حمايا مكنش يعرف أننا هنعمل كدة

أول ما شافها اتبسط رغم أنه كان تعبان، وقالي "ربنا يباركلك يابنتي وكل سنة وأنتم طيبين"
فـ لتاني مرة مش هنسى أبدًا الكلمة دي واللي قالهالي المرة دي عشان اسمعها

برغم كل الوجع والفقد لكن أنا مبسوطة أننا قدرنا نعمل كدة 

وإحنا مش كنا عارفين أنه أخر عيد ميلاد له

الحمدالله أنه كان مميز ومختلف وكلنا اتجمعنا فيه

وأني من أول ما دخلت البيت ده كنا بحتفل بيه ومعاه ومش قطعنا ولا مرة العادة دي

يارب يكون عيده في الجنه دايمًا أجمل ويكون مرتاح في مكانه اللهم آمين

readmore »»

عن 2022

 

تدوينة متأخرة عن 2022 لكنها لازم تتوثق

في 2022 أتاكدت من مدى لطف ربنا وأنه دايمًا بيخبي لينا الحاجات الحلوة جوه الحاجات الوحشة

كانت سنة في بدايتها وجع ومشاكل كتير

وفقدنا بيت اتربينا فيه وسبنا فيه ذكرياتنا وتفاصيلنا وريحة حبايبنا اللي فارقونا

كل ده كان فوق الاحتمال عشان كان كمان في وقت الواحد أصلًا بيحاول يتعافى فيه

لكن مع كل ده كان ربنا بيعوض وعوضه بيبقى كبير أوي أوي

لأنها في المقابل كانت من أكثر وأهم السنين المثمرة في حياتي من ناحية كل شيء

بعد توهان لمدة 4 سنين من وقت مرض ماما وبعده وفاة تيتة ووفاة ماما.. قررت أفوق

كنت بطلت اتفاعل على الفيس أو أكلم أي حد

حاليًا الموضوع مختلف وبقيت أحب أكتر وجودي هناك

وتفاعلي مع اصحابي حتى لو بكلمة بسيطة في كومنت 

حتى تفاعلي مع الناس اللي علاقتنا بسيطة أو حتى مش أعرفهم بشكل قوي

مبسوطة بأصحابي الجداد اللي كسبتهم

ومبسوطة بوجود أصحابي اللي ظهروا في السنين اللي فاتت واتحملوا كل التوهان اللي كنت فيه

ومبسوطة بأصحابي اللي مستمرين من سنين وشافوني في أجمل وأسوأ حالاتي ولسة على العهد

في 2022 مجموعتي القصصية "بريق باهت" خرجت للنور بعد ما اتحبست في الدرج سنين

واتنشرت في سلسلة من أهم السلاسل من الجهات الحكومية ودي حاجة فخورة بيها

كمان فيها قدرت أخلص مشروع أدبي مهم جدًا بالنسبة ليا

بعد ما كان محبوس هو كمان أكثر من 4 سنين

ودي من أهم الخطوات اللي عملتها في المطلق بالنسبة لي الحمدالله

في 2022 دخلت مجال جديد عليا ورجعت للدراسة والكلية تاني

وبدأت دراسة دبلومة اعداد اخصائي تخاطب وتنمية مهارات في كلية تربية جامعة عين شمس

ودي حاجة أنا نفسي متوقعتش أني هعملها فهي بالنسبة لي إنجاز

كمان اتعلمت تزيين التورت بنفسي ومن غير أي مساعدات أو كورسات

 منها بتسلى ومنها بتعلم حاجة جديدة وبفرح اللي حواليا

في 2022 رجعت اقرأ كتير عن الأول وبكتب مراجعات طويلة عن الكتب

 وكمان بدأت المراجعات الصوتية مع جروب ونس الكتب على تطبيق باز

اللي بعتبرها تجربة فريدة بالنسبة لي وخطوة جريئة كنت خايفة جدًا منها ولكني عملتها

قدرت أكتب أكتر، وأكتر بكتير من كل السنين اللي فاتت

في 2022 بدأت الكتابة مع صالون نون الثقافي ببورسعيد، اللي بعتبره مكسب مهم ليا

وخاصة أني بكتب في مجالي ودراستي الجديدة اللي مستمتعة بيها جدًا

وجروب الصالون كله فعلًا ناس كلها محبة وطاقة جميلة

أما نهال هي النور بالنسبة لي السنادي بكل ما في الكلمة من معنى

كانت هي الهدية اللي ربنا بعتها ليا

هي القلب اللي بيطبطب، والكلام اللي بيطمن، والروح اللي بتدفي

واللي بقولها دايمًا شكرًا لوجودك ومحبتك وقربك ونصايحك

ولقلبك اللي يارب يرزقه كل السعادة اللي يستحقها

في 2022 قررت أقفل كل المشاكل ومرجعش أبص على أي حاجة بتحصل

قررت أبعد عن كل الشخصيات الموذية واللي بتتفنن إنها تضايق اللي قدامها

قررت أفضل مركزة في حياتي وبيتي وولادي وجوزي وبس عشان أنا وهما أهم شيء في الدنيا

قررت أركز في شغلي ودراستي وكتابتي وهواياتي عشان أكون دايمًا نسخة أفضل مني

في السنة دي فهمت أن ممكن جدًا المشاكل تكون سبب عشان الحياة تبقى أحسن

أن المشاكل بتعرفنا قيمة كل حاجة جميلة حوالينا

أن العلاقات بتحتاج كل فترة هزة كبيرة تفوقها وتزيد من روابطها

أن الحب جايز يجي وقت ومنقدرش نشوف حجمه كويس في حياتنا

لكن لما بيتعرض لهزة كبيرة بيلمع وينور من أول وجديد

ويرجع ياخد حجمه الحقيقي تاني ويملى الحياة

في 2022  نفسيًا بقيت متوازنة أكتر وقادرة أتحمل السخافات أكتر وسعيدة أكتر الحمدالله

برغم كل الانتكاسات اللي ممكن تحصل

حاسة أني رجعت أنا، دينا اللي بتدور وبتتعلم وبتكتب وبتشارك وبتجري ورا شغفها

الشغف بكل حاجة وأي حاجة مفيدة نعمة كبيرة ربنا يديمها، فالحمدالله دائمًا وأبدًا

كل سنة بتبدأ بوجع ربنا بيعوض بعدها كتير، تفاءلوا بالخير تجدوه

وربنا يعوضنا بالخير دائمًا على قد نيتنا وعلى قد اجتهادنا

لكن بالرغم من كل الإنجازات دي إلا أن 2022 رفضت تمشي من غير وجع

بعد ذكرى وفاة تيتة بيوم واحد بس فقدت حمايا

الأب والحما الطيب والجد الحنين لأولادي اللي مش بيتأخر عليهم في حاجة

واللي كان بيعاملني كأني بنته

ودي الكلمة اللي قالهالي من أول يوم شافني فيه "أنتي هتبقى بنتي التانية" وعد وأوفى

فقد الغاليين مؤلم جدًا، تفاصيلهم اللي سايبنها في كل حاجة

وجودهم وريحتهم وحاجتهم اللي لسة موجودة لكن هما مش موجودين

مؤلم أن ولادي وخصوصًا مازن يعيشوا فكرة وشعور الفقد للمرة التالتة

واللي بحاول اوصله ليهم بأقل وجع ممكن، لكن سؤال مالك على جده دايمًا بيقولي أنه صعب يفهم دلوقتي

يمكن بيطمن شوية إنهم بيرتاحوا من كل هم الدنيا ومبسوطين في مكان أحسن من هنا بكتير

مكان كله راحة ومفيش فيه ألم أو وجع أو حزن

واللي بيطمن أكثر أننا بنبعتلهم هدايا تسعدهم وأننا هنقابلهم مهما طال الوقت

فيارب ارحمه واغفرله وانس وحشته واجعل قبره روضه من رياض الجنة

وجازيه بمرضه حسنات في ميزانه لا تعد ولا تحصى يارب 

والحقه بالصديقين والشهداء اللهم آمين

readmore »»

بطل

 

كانت أمي بطلتي الأولى، 

تحكي لي قبل النوم حكايات الأطفال الممتلئة بالبطولات والشجاعة والمثابرة، 

فأصبحت تستهويني وتدفعني لطلب المزيد منها.

عندما كبرت وأصبحت اقرأ بنفسي، كنت أبحث عن قصص الأبطال، 

وعلى مدار سنوات قابلت الكثير والكثير منهم.

رجل المستحيل ن1، قطعة فريدة نادرة لم تتكرر، 

كان بطل جيل بأكمله وبطل مصر في نظرنا، 

رفيقته منى كانت بطلة بالنسبة لي 

وتمنيت في الكثير من الأوقات أن أكون مكانها والتحق بكلية الشرطة.

‏

ملف المستقبل نور وفريقه مجموعة من الابطال، 

الذين غلبوا الزمن والفضاء والفيروسات والمجهول بجميع صوره 

وبسبب هؤلاء الأبطال اهتممت بالفيروسات والتعرف عليها والقراءة عنها بتوسع.

صرخة الرعب، جعلتني اطرح سؤال على نفسي..

 كيف يمكن لأطفال في مثل عمري يحاربون الخوف بضراوة هكذا؟ 

كيف يمكن أن يكونون ابطال حياتهم عن جدارة، 

لم تخيفني يومًا قصصهم وكأنني اكتسبت منهم الشجاعة والقوة.

ما وراء الطبيعة، رغم أن رفعت اسماعيل لم يكن بطل في نظر نفسه، 

ولكنه كان بطل يرتدي البدلة الكحلية التي تجعله فاتنًا في نظرنا جميعًا.

لم أكن أهوى السفاري 

ولكن د.علاء عبد العظيم كان بالنسبة لي بطل في كيفية كشف الأمراض وعلاجها 

وتعريفي بها بصورة بسيطة.

تعرفت على الكثير من الأبطال طوال عمري، 

منهم من قرأتهم ومنهم من قرأوني، 

حتى جاءني اليوم الذي استطعت أن امسك بالقلم واخط بيدي الأبطال.

كنت أرسم كل واحدًا منهم حسبما أراه، 

فجأة أجد البطل مجسدًا أمامي بملامحه وكيف يتحدث 

وما هي اللازمات الموجودة في كلماته، وحتى تصرفاته.

لم أخطط يومًا نهاية بطل من أبطالي ولكنهم وحدهم من استطاعوا ذلك، 

كانوا يأخذون مني القلم ويبدأون في رسم احداثهم دون أن أدري، 

فحين استفيق اجدهم قد انهوا المهمة على أكمل وجه، 

اقرأ واسأل نفسي من كتب كل هذا؟! لا أجد منهم رد!.

فأعيد نشر كل ما كتبه أبطالي مُذيل باسمي، 

فأنا وحدي من جئت بهم وصنعتهم على الورق 

وبالرغم من انهم من اكملوا بإيديهم احداثهم 

إلا أنني وحدي استطيع محوهم أو الإبقاء عليهم، 

أنا وحدي من أملك القدرة على البقاء على الأبطال في حياتي أو الإنتهاء منهم، 

لأنني وحدي بطلة حياتي الحقيقية.

النص مشاركة في مبادرة الكتابة اليومية في شهر ديسمبر

DecWriters2022

readmore »»