ده اسم حمله عملوها شباب
بيطالبوا فيها بتسيير نفقات الجواز
سواء كان من طلبات الاهل
او حتى بمساعده الحكومه فى موضوع الشقق مثلا
صراحه عاجبانى الفكره اووى
من قبل موضوع الحمله ده وانا دايما بفكر فى حكايه الطلبات
اللى الاهالى بيطلبوها من الشباب اللى عايزه تتجوز
فى نوعيه من الاهالى
بيتصوروا انهم لما يطلبوا من الشاب اللى جاى يتقدم لبنتهم طلبات كتير
يبقى هما كده بيعملوا الافضل ليها وبيأمنوا مستقبلها
مش قادره افهم انهى مستقبل ده اللى بيتعاملوا معاه بطريقه ماديه وبس كده
ماحدش قال ان الاهل يتنازلوا عن اى حق من حقوق بنتهم
ولكن كأمثله
الشبكه
هو ليه مطلوب من اى عريس انه يجيب شبكه
هو ماحدش عارف سعر الدهب كام النهارده؟؟
ماهو ممكن يبقى تمن الشبكه ده مفيد فى حاجه اهم وأولى
وكفايه الدبله كأشهار للخطوبه وبس
الشقه
ايه المشكله لما الولد مش يكون عنده شقه
طب ما ياخد شقه ايجار
ما فى الاخر اسمها شقه بردو
او حتى الفكره اللى الشباب اقترحوها فى الحمله دى
ان الحكومه تطبق فكره يابانيه الاصل فى بناء الشقق
بحيث ان السرير والدولايب والكراسى تبقى بالاسمنت
يعنى كأن الشقه متجهزه ويبقى فاضل حاجات بسيطه
كنوع من التوفير
صراحه الفكره جديده علينا اوى
فرش الشقه
الفرش ده بقى قصه
فى اهل بيحطوا دايما الناس اللى حواليهم مقياس لعفش بنتهم
يعنى هيجيبوا السجاده زى سجاده بنت اخت عم ابوها
اللى جابتها ب 5000
وهيجيبوا الصالون زى صالون اخت مرات خال امها
اللى جابته ب 10000
اصلها ماينفعش تبقى اقل من قرايبها فى حاجه
وهما مالهم بأى حد اصلا
بنتهم دى لو جاتلهم فى يوم بتعيط
ماحدش من الناس اللى بيقلدوهم دول هينفعهم
كل واحد ومستواه المادى
ايه المشكله لما تتجاب كل حاجه بس فى المعقول
ماهو كمان ممكن تتجاب الحاجات الضروريه فى البدايه وبعدين الولد والبنت يبقوا يكملوا على مهلهم
ماهو الحاجه اللى هيجيبوها دى مش بتاعه العمر مثلا
ما فى حاجات هتفضل وحاجات هتتغير
طب ليه بقى كل حاجه لازم دلوقتى
طلبات تانيه
زى مثلا المؤخر والقايمه
دول بقى فيهم قصص وروايات
منها ان الولد ممكن يكتب شيك على نفسه
انا مش متخيله انهى أهل دول ممكن يامنوا ولد على بنتهم بمقابل شيك
هو الشيك هينفعهم فى ايه؟
هو ده حق ربنا وماقولتش حاجه
بس فكره تنفيذه دى اللى غريبه
ماينفعش الاهل يفكروا فى جوازه بنتهم بطريقه ماديه بالمنظر ده
الماده مش كل شئ
ده انسان هتستأمنه على بنتك اللى هى حته منك
يعنى عمر ابدا ما الفلوس هتفرق معاك لو بنتك حصلها حاجه
او مش راعى ربنا فيها
بيتهيألى ان الفلوس مش هتنفع حد من الاهل لو ده حصل
لا وبعد ده كله
الاهالى بيسألوا هو ليه البنات بتعنس؟!!؟
عشان يا عينى الشباب جالهم عقده نفسيه خلاص
ربنا يكون فى عونهم صراحه
.jfif)
16 comments
ممكن يكون عندك حق بس فى حاجة تانية مش عارفة عندك خلفية عنها ولا لأ
احيانا لما الأهل بيطبقوا التسييرات دى
الزوج فعلا بيفضل فى جوازه مش حاسسس بقيمة زوجته او ان الاهل تساهاوا عشانه
الرجال دلوقتى اصبحوا بيقيسه الموضوع ده بمقياس خاطئ تماما بسس وسائل الاعلام اللى بقت تصور عدم زواج البنت بشكل مش ظريف
مدونتك حلوة اوووووووى
انا سعيدة انى قابلتها
hanan khorshid
بنت سايكو
موضوع مهم أوي للأسف العادات و التقاليد في مصر بتقف حائل في جوازات كتير بس تعرفي الناس الطيبه اللي معدنها أصيل مبيوقفوش جوازه عشان ماديات و بيحاولوا يكملوا بأي شكل عشان شارين بعض...لكن بقى الناس اللي مش شاريه هما اللي بيوقفوا المراكب السايره و هما اللي بيتعنتوا في طلباتهم.
بوست رائع و سردك ممتع
تحياتي الخالصه لكي
شيرين سامي
احنا اساتذة فشخرة كدابة
كل اب بيعتبر الجواز صفقة ولازم يكسبها وبنته لازم تتباع باغلى تمن
بنت فلان مش احسن من بنتي
وفي نهاية الفشخرة دي تلاقوا عدد البنات العوانس زاد وزادت سن الزواج بالنسبة للولاد وتطلع حملة زي دي تقول جوزونا
طيب ما الاحسن كاباء نفهم قواعد ديننا كويس ولو اتقدم لبنتي من ارتضي دينه اجوزه دون خوف من فقر
كان ساعتها اغلب المشاكل اتحلت
مكنش الدهب بقى بالشيء الفلاني مكنتش الشبكة بقت بالوفات مالفة
تحياتي بوست مهم
بصى يابنوتة انا معاكى جدا فى حكايه الشبكة دى هدية ونا ماعرفش ازاىناس تتشرط على الهديه اينعم جرى العرف ان البنت تتشبك زى بنات عيلتها بس ده مش قانون الفرش والحاجات دى بردوا حاجات ممكن التغاضى عنها حكايه شقة اجار جديد مشكلتها فى عدم الاستقرار يعنى انا اعرف زوجين متجوزين بقالهم سنتين وصاحب الشقة هينهى العقد واهم محتارين يروحوا فين بعفشهم لحاجة اجارها معقول
والمؤخر بقى فده حاجة بيحاول يربط بيها الاهل العريس بحيث لو طلع تيتي يبروه رغم ان العقل بيقول طالما امنوه على بنتهم يبقى الفلوس مش هتصلحه لو خاين بس اهو محاوله بس
والله الموضوع مهم فقد ارتفعت نسبة العنوسة في الوطن العربي بشكل كبير بسبب غلاء المهور والحاجات التي لافائد منها
موضوع جميل وله مناقشات واقتراحات جميلة تحياتي
hanan khorshid
بنت سايكو
انا عارفه الموضوع ده
بس الفكره هنا اولا فى اختيار الزوج المناسب لبنتهم
وانه يكون على خلق
ولو انسان على خلق اكيد هيراعى النقطه دى
بالعكس ده هيشيل البنت فوق دماغه واهلها كمان
ميرسى ليكى يا حنان نورتى المدونه
وسعيده جدا بزيارتك :))
شيرين سامي
اكيد يا شيرين
فى ناس بيتعاملوا بمبدأ انهم يهتموا الاول انه انسان يراعى ربنا فى بنتهم مش مهم الماديات
اللى قولته ده مش عام بس فى حالات كتير اوى بنشوفها قدامنا دلوقتى
سعيده بزيارتك وتعليقك ونورتينى يا قمر
مصطفى سيف
فعلا لو نرجع لديننا هنعرف ايه الصح
لان ديننا مش قالنا نغالى فى الطلبات كده
وكانت النتيجه ان نسب حاجات كتير اوى زادت
زى العنوسه وحالات التحرش والاغتصابات كمان
يعنى الموضوع بقى على الولد والبنت
شكرا ليك جدا يا مصطفى على رأيك وتعليقك
reemaas
انتى قولتى نقطه لافته نظرى بردو يا ريماس
هو ليه العرف ان البنت تتشبك نفس بنات عيلتها
ماهو كل انسان ظروفه بتختلف عن التانى
حتى لو ظروفه كويسه ماهو ممكن الفلوس دى تبقى اولى فى حاجه تانيه
شوفت حالات زى اللى قولتيها فى موضوع الايجار الجديد
بس لو كان ده الحل الاخير يبقى لابد منه
اللى بيبقى عايز يبيع بيبع كل حاجه
يعنى هو لو واحد عايز يطلق مراته هيفضل يضايق فيها لحد ما هى اللى تقول حقى برقبتى وتسبله المؤخر وكل اللى عايزه بس عشان تخلص منه
مش هيفرق عندها ساعتها فلوس
ولا هيفرق عند اهلها هما كانوا طالبين منه كام
منورانى يا ريماس وميرسى اوى على تعليقك وزيارتك :))
كريمة سندي
فعلا يا كريمه العنوسه الاهالى سبب كبير اوى فى زياده نسبتها
شكرا ليكى على رأيك ونورتينى
والله إنتي طمنتيني إن فيه بنات بيفكروا كده
أنا عن نفسي , وبصراحة , مش مقتنع بموضوع الشبكة والمؤخر والقايمة , وأصلا الشريعة الإسلامية مفيهاش ولا شبكة ولا قايمة , بس فيها مهر . .
وبعدين الأهل (في رأيي) لو بيعاملوا العريس علي إنه نصاب بما إنهم بيمضّوه , فيبقي بلاها منه أحسن . .
FAW
لا فى بنات كتير بتفكر التفكير ده
زى ما فى بنات بتفكر تفكير مادى بردو
ماهو لو العريس نصاب
يبقى ماقدرش أامنه على بنتى اصلا
مش مجرد شيك
شكرا ليك على تعليقك وزيارتك :)
ويقولو نسبها لعنوسه ليه فى مصر عاليه اوى كده
ده الاسباب بتشرح نفسها ان الاهل بيعاملو العريس على انو جاى يشترى نقله رمل بيتقاولو عليها مش جايين يعرفو انا لعريس واحد هى اخترتو او اختارها وهيحطها فى عنيه وناس كتير اوى تقولك لا احنا بنشترى راجل والكلمه دى بالنسبالك انهم هيخلوه يشحت بعد الجواز وبعدين ماهو ممكن بعد مالقدم المهر والمؤخر والشبكه وكل الليله دى يفكرها فى عشتها وتبيع اللى وراها واللى قدامها عشان تتخلع اللى بتكرهه بتبيع شعر راسها
NaiRa
بس فى ناس عندهم كلمه بنشترى راجل دى بجد على فكره مش اى كلام
وفعلا اللى عايز تبيع هتتنازل عن كل حاجه
تسلمى يانيره على رأيك منوره
أشكر حضرتك جدا على مساعدتك لينا في نشر الفكرة واسمحيلي اني اشير موضوعك الرائع على صفحة الجروب وبرحب بيكي بالنيابة عن أسرة الجروب معانا واتمنى المزيد من المشاركات الفعالة
انا اللى بشكركم والله انكم فكرتوا فى الحمله دى
لانه هتساعد شباب كتير
واكيد يشرفنى انك تضيفى الموضوع فى الجروب
ميرسى ليكى
Post a Comment