هو المفروض ان كل حاجه حصلت قبل الثوره تتغير؟
سواء حلوه والا وحشه؟
اصل قريت من قريب
انهم عايزين يغيروا النشيد الوطنى
اشمعنا؟؟
هو حسنى مبارك اللى مألفه؟
والا هو اللى كان بيغنهولنا؟؟
والا يكونش النشيد طلع من فلول النظام؟!؟
هو اه النشيد فيه كلمات صعبه
والعيال الصغيره اللى بيحاولوا يحافظوه فى المدرسه
بيشلفطوه خالص وبيخلوا الكلمات فيه مالهاش اى معنى
بس مش متخيله الواحد هيحس بنشيد غيره ازاى
ده احنا بنفتكر طابور المدرسه بالنشيد مش بأى حاجه تانيه
هو كل حاجه قبل كده حصلت تبقى وحشه
ومش هينفع مصر تبقى احسن الا لما نغيريها؟
بردو قريت ان الاذاعه والتليفزيون كانوا عايزين يشيلوا لقطات كتير من افلام او مؤتمرات
موجود فيها حسنى مبارك وغيره من النظام السابق واللى محبوسين دلوقتى
بيتهيالى بالطريقه دى بيمحوا جزء من التاريخ
حتى لو كان الجزء ده مش على مزاجنا
حتى لو كان الجزء ده مش على مزاجنا
دلوقتى بقت على كل حدث بيحصل
بيطبق عليه فيلم او حتى اغنيه
بالزمن اللى احنا فيه ده
طريقتنا لتسجيل الاحداث من حوالينا بقت فى السينما والتلفزيون والاغانى
يعنى دول كلهم فيهم جزء من تاريخنا والظروف اللى بنمر بيها
ليه نشيل جزء من التاريخ لمجرد ان االحماسه دلوقتى واخدنا
ومش شايفين غير ان الناس دى نمحيهم من اى حاجه هما فيها
طب ما مصر عدى عليها حاجات كتير اوى ظهرت فى الافلام
ليه مافكروش يشيلوا حاجه منها؟
شايفه ان ده تاريخ
سواء كنا عايزينه دلوقتى والا مش عايزينه
بس ولادنا هيجوا بعد كام سنه يسالونا عن كل تفصيله فيه
واحنا مجبرين نرد عليهم سواء بالحلو او الوحش
عشان ماينفعش يشوفوا صوره مش كامله
.jfif)
26 comments
يروحوا يشيلوا الاسفاف وقلة الادب الموجودة على الفضائيات الاول
ههههههه
فعلا شر البلية ما يضحك
_______
Casper
برافو على هذا البوست الجامد
انت فكرتينى لما قامت ثورة يوليو 52 راحت مجموعة من الضباط للاذاعة ومنعوا اغانى ام كلثوم باعتبار انها كانت تغنى للملك فاروق فاشتكت لعبد الناصر وامر باعادة الامور كما كانت وقال عبارة شهيرة (متشيلوايقى الاهرامات عشان كانت موجودةايام الملك الملب)
هذا تهريج يجب وقفه لان هذه المعالم جزء من تاريخنا ودمتى
على فكرة انا برضه من انصار تغيير النشيد وكمان العلم الاتنين مش عاجبني
عايزين نشيد جديد بروح جديدة ويا سلام لو اللي هتغنيه هيفاء وهبي:)
بهزر طبعا بس اصلا النشيد بيتغير عادي اعتقد ان السادات هو اللي خلا نشيد بلادي بلادي وقبله كان نشيد اسلمي يا مصر انني الفدا اللي شايف انه احلى من بلادي بلادي
اما عن العلم انا معترض جدا جدا على النسر اللي فيه وعلى فكرة اللي حط النسر في العلم هو مبارك
كان ايام السادات صقر
علشان كده نفسي النسر يتشال ويتحط اي حاجة معبرة عننا اكتر مش طائر جبان زي النسر يتغذى على الجيف يبقى رمز لينا
تحياتي واشكرك
أظن فعلا ان اللي بيحصل دا مش معقول الا النشيد الوطني دا جميل جدااا صحيح والواحد كان بيقولوا غلط وفاهمة بردو غلط بس مأظنش ان فيه نشيد بنفسه في الجمال,يابنتي العملية دلوقتي متلخبطة اووي عايزيين يبيدوا اي حاجة للريس السابق ..خلينا نكون منصفيين الراجل اه عمل حاجات وحشة كثير لكن محدش ينكر انه عمل حاجات حلوة بغض النظر حتي لو هو مفيش حاجات حلو هو مش تاريخنا بردو والاحتلال الانجليزي تاريخيا والفرنسي نرمي كل حاجة ليه دلوقتي ؟!!
انا ضد كل الحاجات اللي بتحصل لي بطريقة دي ...!!
على ايه ما بعتوا رساله لوزير التربيه والتعليم عاوزين يشيلوا اى اسم لمبارك فى الدراسه
التريخ يا جماعه عمره ما حد هيقدر يمحيه ولو المؤرخين بيارخوا على مزاجهم كان زمنا لغينا اعظم القتله من تاريخنا
كنا لغينا النكسة
تحول المشكلة او الثورة من مطالب من اجل الحرية لمجرد ثأر من شخص او عيله او حكومة دى حاجة مخيفه
دي عادة فرعونية قديمة مستوطنة زي الامراض المسطوتنه
:)))
لازم النظام لما يمشي ياخد تاريخه معاه
:)))
Casper
والله على رأيك :))
ميرسى ليك اوى
faroukfahmy58
هو تقريبا ده نظام ما بعد الثورات
بعد كل ثوره يشيلوا الى قبلها
نفسى افهم ليه
والا النصر بيبقى واخدهم اوى كده
ميرسى ليك جدا :))
مصطفى سيف
انا يمكن مش شايفه نشيد لان ده بس اللى عاصرته طول حياتى فا متعوده عليه اكتر
العلم ماشى يتغير
بس تغير بسيط زى ما قولت انما مش تغيير جزرى زى ما كان بيحصل قبل كده
ميرسى ليك جدا على رأيك :))
ياسمين
انا معاكى جدا يا ياسمين فى كلامك
ماافلام كتير صورت الاحتلال الانجليزى فى ابشع صوره
ليه مش فكرنا نمسحها
بالرغم من انها اضرت بناس كتير وناس كتير استشهدوا وقتها
يفرق ايه بقى
ميرسى ليكى ياجميله على رأيك :))
reemaas
عاجبتى اوووى يا ريماس كلمتك
انها اتحولت لثأر من شخص بعينه
انا حاسه ان ده اللى بيحصل دلوقتى
ميرسى ليكى يا قمر :)
شمس النهار
والنتايج بعد كده بتبقى علينا
عشان جزء من تاريخنا بينمحى
ميرسى ليكى اوى :))
والله حاجة تخنق
كل حاجة عاوزين يغيروها
انا معترضة على حاجة زى كده لانهم فعلا بيمحوا التاريخ
حتى لو التاريخ ده كان وحش فى النهاية هو حاجة حصلت ولازم تفضل موجودة على الاقل علشان نتعلم منها
بس الفكرة ان كل القيادات الاعلامية دلوقتى بتحاول ترضى الثورة بأى شكل حتى لو كان غلط
Noha Saleh
ومش بس الاعلاميين
والسياسيين كمان حتى لو كانوا ضد الثوره قبل كده
من الاخر هما مع الكسبان
ميرسى ليكى يا نهى على تعليقك :)
التاريخ سيبقى
بكل ما فيه وما عليه
بحلوه وبمره
بس ده حال كل الثورات
اللى بييجى لما يهد كل اللى فات واللى بيمشى لازم ياخد تاريخه معاه
وكأن التاريخ اصبح ملكا لأشخاص
احسنتى بوست فى معاده
يمكن اللى بيطالب بالتغيير يفهم
معناه الاول
معاكي حق
وانتِ لخصتي سبب عدم محو أى جزء من التاريخ في آخر جملة كتبتيها "عشان ماينفعش يشوفوا صوره مش كامله"
وأتفق 100%
سعيدة بمروري لمدونتك الرقيقة البمبيكا :)
تقبلي مرورى
تحياتي
اتفق معك عزيزتي فيما قلتي فهو جزء من التاريخ بحلوه ومره
تحياتي الصادقة
أنا معاكي الظمن و التاريخ هو اللي هيحكم على الناس دي مش لقطات فيديو بالعكس احنا مش لازم ننسى عشان نتعظ.
بوست مهم
تحياتي الخالصه لكي
شيرين سامي
givara
"و"كأن التاريخ اصبح ملكا لأشخاص
صح اوى الجمله دى
دلوقتى بيعاملوا تاريخ مصر فى ال 30 سنه اللى فاتوا بأسم حسنى مبارك
فا لازم نمحيها
تفكير غير منطقى بالمره
المفروض نفهم التغيير على انه تغيرنا احنا الاول للافضل
ميرسى ليك على رأيك ونورتنى بزيارتك :))
آخر العنقــــــود
انا اسعد كتير بمرورك الجميل ده
نورتنى وميرسى اوووى ليك على زيارتك وتعليقك :))
كريمة سندي
انا كمان متفقه معاكى جدا
ميرسى ليكى على متابعتك نورتينى :))
شيرين سامي
صح او كلمتك
لازم مش ننسى عشان نتعظ
عشان نفضل فاكرين ليه اصلا الثوره قامت
ميرسى ليكى كتير ونورتينى :))
أولا بحيكى بجد على البوست
ثانيا
أكيد عمرهم ما يقدروا يغيروا النشيد الوطنى لأنه مش بتاع مبارك ولا بتاع شخصيه بعينها ده تعبير عن مصر على مر السنين وما نعرفش غيره ومش عاوزين نعرف غيره حتى لو صعب على الصغيرين بكره يحبوه لما يكبروا لما يعيشوا فى بلد يحبوها كده على بعضها بحلوها وبمرها
وحيشيلوا مبارك من ايه ولا ايه أكيد مش مش حيحصل يعنى لو فيلم أو مسلسل مثلا وفى قسم أو مصلحه حكوميه وصورته متعلقه على الحيط حيشيلوها أو يقصقصوا فى المؤتمرات أكيد كلام مش معقول إحنا نكستنا التاريخ أرخها يعنى التاريخ زى ما بيأرخ الأحداث العظيمه كمان بيسجل الأحداث المؤلمه
بيتهيألى كلام مش معقول يتنفذ
تقبلى مرورى
مرايتى
المشكله اننا مش هنحس بنتيجه كل ده الا بعد كام سنه
لما نلاقى فجأه ان المعلومات المؤرخه عن النظام السابق قليله جداااا
ودى تبقى كارثه عشان مش هيبقى فى معنى للثوره لان اللى خلاها تقوم اصلا مش مفهوم اسبابه
كلام مش معقول يتفهم مش بس يتنفذ
ميرسى ليكى جدا على رأيك وزيارتك وشرفتينى :))
نفسى يشيلوا النسر من العلم و يحطوا مكانها حمامة بس تكون مشوية و من عند فرحات دليل على العز اللى احنا هنشوفه
نتكلم جد دى عادة فروعنية السادات لما جاء غير مدينة ناصر الى مدينة نصر
بحيرة ناصر الى بحيرة السد استاد ناصر الى استاد القاهرة
ايضا فى الافلام القديمة اى صورة للملك يتم وضع تشويش عليها و لعل اشهر هذه اللقطات فى فيلم غزل البنات اثناء اغنية عبد الوهاب عاشق الروح
ربنا لا يقطع لنا عادة
ابراهيم رزق
ههههههههه
بجد ضحكتنى اوى على اول جمله دى
انا مستغربه صراحه من الموضوع ده
يارب تتقطع العاده دى بقى فى الفتره الجايه
المفروض الثوره تدى نتايج غير اى حاجه قبل كده
ميرسى ليك جدا على تعليقك ونورتنى :))
Post a Comment