لما واحد بيدخل منافسه
مش بيدخل منافسه عشان يثبت لنفسه انه كويس اوى وشاطر
لكن بيدخلها عشان يثبت لنفسه وللى حواليه
انه افضل من اللى بينافسهم تحديداً
التنافس بيخلق روح التحدى جوه اى حد فينا
بس بحس انه تحدى مؤقت
عشان بتتنافس فا انت هتتحدى اللى بتنافسهم دول
بس بعد ما المنافسه دى تخلص
التحدى اللى جواك هيقل
واحتمال كبير يختفى
ادام اتولد مع المنافسه دى بالذات
الكلام ده بيفكرى بايام المدرسه
لما يفضل طالب يطلع الاول دايما
ومفيش معاه اى حد بينافسه
هيجى عليه وقت ويزهق ومش هيبقى عنده روح التحدى
فا انه دايما يذاكر عشان يطلع الاول
هيقول بينه وبين نفسه
ما انا دايما الاول
هتفرق ايه بقى
بالظبط ده فى حياتنا كلنا على اختلاف المستويات
فى الدراسه وفى الشغل وفى حياتنا عموما
المشكله ان المنافسه دى ممكن تقلب بشكل تانى
وهو الغيره
الغيره من اللى حواليك لانهم مثلا بيتخطوك فى اى منافسه
فى غيره كويسه هتوصلك للاحسن
وفى غيره هتوصلك للاسوء
غيره هترجعك لورا
وانك مش قادر تبقى فى حجم اللى بتنافسهم
وهتبقى دايما حاططهم قدام عينيك
وعايز تبقى زيهم
مش تبقى نفسك
ولما ماتعرفش تبقى زيهم
ولا تبقى نفسك
هتبقى حد ماتعرفوش اصلا
ودى اكتر حاجه بتوجع
.jfif)
21 comments
nice post
my regards
ميرسى ليك جدا على تعليقك
ونورتنى :))
عندك حق وده اللي الاهلي عمله ساب الزمالك يفرح شوية بالقمة وبعد كده شد حيله...وجابه لمركزه بتاع زمان....صحيح الواحد مابيعرفش يلعب لوحده لازم حد قصاده بس لازم يكسب لو لعب...جميل فكرتك اوووي
دايما ده اللي بيتزرع جوانا من الصغر
يقولك بص لابن الجيران بيذاكر ازاي يلا اعمل زيه علشان ميجبش مجموع اكبر منك
وفي حصة الالعاب يقولك اوعى تخلي الفريق التاني يجيب جول
اللي بيتزرع جوة الطفل وقتها مش اني افوز او اكسب بس لا بيتزرع جواه حقد على المنافسين ويفكر ازاي يخسرهم و الحقد بيكبر جواه لحد ما يشتغل يتحول على زمايله
وقها مش هيبقى نفسه ولا غيره
والسبب هو تربية غلط
تحياتي
اتفق معك غاليتي فالمنافسة الشريفة لابد لها من أطراف مشاركين حتى لا نصل إلى اليأس والإحباط
المنافسة لن تنتهي هكذا هو حال الدنيا
_________
خالص تقديري لفكرك وقلمك
تقبلي مروري
Casper
Tarkieb
اكيد طبعا
مالهاش طعم اى مسابقه من غير منافسه
ميرسى ليك جدا
ونورتنى بزيارتك :))
مصطفى سيف
والله صح بردو يا دكتور
احنا من صغرنا ودايما لازم نحط الناس قدام عنينا
مين الافضل عشان نبقى احسن منه
مش تحدى نابع من جوانا من غير اى مؤثرات خارجيه
ميرسى ليك على رأيك ومنورنى دايما :))
كريمة سندي
معاكى حق جدااا
ميرسى ليكى ونورتينى :))
Casper
فعلا
حياتنا كلها منافسات
ميرسى ليك جدا :))
أنا بحب أي حاجه فيها منافسه بتخلق جوا الواحد تحدي و تطلع منه أحسن ما عنده لكن الغيره مش نتيجه صحيه للمنافسه.
تحياتي ليكي
شيرين سامي
المنافسه جميله بس الاجمل الطموح
مش شرط منافسه مع حد معين بس ان الحياه تبقى اهداف وكل هدف بيخلق هدف جديد
هو ده اللى المفروض نتربى عليه من صغرنا
لكن منافسه لمجرد انى ابقى احسن من اشخاص
طيب وبعد ما ابقى احسن منهم ؟؟؟
الموضوع اللى بتطرحيه جميل ومناقشته مهمه
تحياتى
روح المنافسه دي لما الواحد بيفقدها بيحس انه معندوش هدف سواء كان اكبر من المنافسه و مستواه اعلي أو يكون حاسس انه مش قد المنافسه و مش عارف يخوض التجربه و دايما كده بيحس بالنقص
و اهم نوع من المنافسه هي منافسة الذات
و تحدي النفس علي النجاح و الثبات عليف في مختلف الظروف
يارب اوعدنا نكون من الناس دي
تحياتي ليكي علي مناقشة الموضوع ده
شيرين سامي
الغيره فعلا اللى بتقتل روح المنافسه وبتخلق بدل منها الحقد والحسد
ميرسى ليكى اوى :))
iـــــــsــــــlــــــــaـــــــm
ماهو بعد ما تبقى احسن منهم التحدى هيقل عشان هدفك وصلتله خلاص
فى المنافسه بالذات الهدف بيبقى انى ابقى احسن من اللى بنافسهم
الموضوع كله فى التربيه فعلا
ميرسى ليك جدا وسعيده اوى بزيارتك :))
احساس حلو اوى لما يكون ليك ند فى حاجة معينة تتنافسوا وتطلعوا احلى ماعندكم التفوق بعد كده نسبى
الحيام من غير منافسه بتبقي حياه بدون هدف
سواء كان الشخص اكبر من المنافسه وهو دايما شاطر او مش قادر يدخل المنافسه علشان حاسس انه اقل من انوا يدخل فيها
و اهم منافسه هي المنافسه و التحدي مع الذات
و دي بتبقي اصعب
يارب اوعدنا نقدر نتحدي نفسنا علي النجاح و الثبات
تحياتي ليكي علي الموضوع ده
زهرة الضحا
انا معاكى جد فى كلامك
اجمل شئ منافسه النفس
لانها مش بتقف على حد
انا بنفسى اللى بتحدى نفسى
ميرسى ليكى جدا ونورتينى بزيارتك :))
reemaas
ماهو وجود ند ده اللى بيدى دايما احساس انك عايز تبقى احسن
ميرسى ليكى يا قمر منورانى :))
أقولك على سر ؟
مش بحب المنافسات ^^"
بحس إنها بتخلق نوع من التنافس الغير شريف و الغيرة القاتلة في مجتمعنا
أنا بحب الهدوء و السلام
بس ما يمنعش إني بحب أنافس نفسي و أتفوق عليها :)
Sara
انا بردو زيك بحب الهدوء ده
بحس ان المنافسات بتخلق نوع من التوتر اصلا جوه كل واحد
بس بردو الواحد من وقت للتانى بيبقى عايز دفعه وتشجيع كده مش بيلاقيه الا فى التنافس :)
Post a Comment