كل حياتنا دلوقتى بقت عباره عن اعلانات
فى نوعين من الاعلانات
اعلانات احنا بنعملها
واعلانات ناس تانيه بتعملها فينا
الاعلانات اللى احنا بنعملها
اننا من اول ما بنصحى لحد ما بنام
بنعتمد على حاجات كتير بنقتبسها من الاعلانات
سواء جمل بتتقال فى اعلانات
وده لاننا بنتأثر بشكل كبير جدا بكل كلمه بتتقال فى الاعلانات تحديداً
من كتر ماهى بتتعاد قدامنا فى اليوم خمس تلاف مره
وسواء كانت الحاجات اللى احنا بنستخدمها المعلن عنها
والاعلانات اللى بتتعمل فينا دى بقى
يااااااااما بنشوف منها
جرب كده تقعد تتفرج على مسلسل على اى قناه
من 3 العصر ومعاك لحد 11 بليل
فى الكام ساعه دول
القنوات كلها بترزع الواحد فى وشه بين كل فاصل وفاصل فى اى مسلسل
يجى نص ساعه اعلانات
تيجى بقى انت تحاول تشوف المسلسل لما الفاصل الاعلانى ينتهى
ابقى قابلنى ان افتكرت من اللى شوفته قبل الفاصل حاجه
الواحد بينسى اصلا هو كان بيتفرج عليه
الاعلانات اصلا بقت شاغله حيز كبير اوى من التليفزيون
زيها زى المسلسلات والافلام
يعنى لو حسبناها هنلاقيها واخده نفس المساحه تقريبا
وفى النهايه ده كله على حساب صاحب المحل اللى هو احنا يعنى
غير انهم بيقرفونا
الا انهم بيعملوا كمان غسيل مخ للى مش فاهم سياسيه الاعلانات
واولهم الاطفال الصغيرين
اللى متخيلين ان كل حاجه بتيجى فى التليفزيون دى صح ميه فى الميه
وخصوصا لو كانت حاجه موجهه للسن الصغير ده
بتبقى مصيبه لوحدها
بالنسبه بقى لسياسه الاعلانات
فى اعلانات لافته نظرى اليومين دول
لانها ليها علاقه باللى احنا فيه الفتره دى
فى منتجات معينه عملت اعلانات ان جزء من تمنها هيتوجه لأعمال خيريه
ده بما اننا فى فتره اصلاح بشكل عام دلوقتى
زى مثلا محو الأميه وغيرها من النشاطات اللى من النوع ده
طب فى سؤال بيطرح نفسه فى دماغى
هو احنا هنعرف منين ان فعلا تمنها بيروح فى الاتجاه اللى بيقولوا عليه؟؟
هنمشى ورا الراجل اللى بنديله حق المنتج ونشوف هيودى الفلوس فين؟
والا هما بردو هيصورلنا العمليه دى فى اعلانات؟؟
ممكن حد يقول المهم النيه
واننا بنشترى الحاجه دى عشان نساهم فى العمل الخيرى ده
بس انا بردو هاقول ان لو احنا قولنا المهم النيه عندنا ومش مهم هما بيعملوا ايه
يبقى هما فى النهايه حققوا الغرض من سياسيتهم فى عرض الاعلان ده
الربح المضاعف على حساب الكلمه السحريه
"لصالح الأعمال الخيريه"
يعنى هما مش بس بيستهبلونا
لا دول كمان بيتأجروا بأسم الاعمال الخيريه
اللى هى أسمى بكتير من كده
هو احنا المفروض فعلا نشترى المنتج عشان نساهم فى العمل الخيرى ده وحسب نيتنا بقى؟
والا المفروض مثلا نتأكد الاول ان الشركه صاحبه المنتج ده ليها فعلا علاقه بالاعمال الخيريه اللى بتعلن عنها؟
.jfif)
25 comments
اعتقد والله اعلم ان اي منتج اعلاني خاضع للرقابة يعني ميقدروش يعلنوا عن حاجة الا اذا كانوا فعلا هيعملوها
ميعلنوش عن مسابقة الا اذا كانت حقيقية وميعلنوش عن عمل خيري الا اذا كامن لازم يعملوه
ده المفروض بس مش متاكد في جهة رقابية فعلا ولا بيقبضولهم قرشين وخلاص
وبعدين رايي متجيبش اللي انت محتاجه بغض النظر عن اي اعلان
تحياتي
اتكلمتى عن اكتر حاجة غيظانى فى الدنيا...الاعلانات
بصى الاعلان لازم يكون فعلا ملفت للنظر ولازم كمان يكون موجه للشريحة المقصودة
يعنى مثلا تلاقى البسطاء والفلاحين فى اعلانات عبلة كامل ووبيريل اللى بيحقق للناس احلامها وتلاقى الناس الشيك فى اعلانات القرى السياحية والعربيات
فى نهاية الاعلان ده علم كبير جدا والشاطر اللى يعرف يكسب من وراه
نسيتى تتكلمى عن اعلانات التلفزيون السخيفة بتاعة الملايات والمراوح والبطاطين الصينى
مصطفى سيف
ماهو ممكن فعلا ياخدوا جزء من التبرعات ليهم
وجزء يروح للعمل الخيرى اللى اعلنوا عنه كستار يعنى
ده قصدى
الله اعلم بقى فى جهه رقابيه والا لا
ميرسى ليك جدا ومنورنى دايما :))
Noha Saleh
بس بحس صراحه فى اعلانات زى بتاعه عبله كامل عن الفلاحين
مش ده المنظر الحقيقى
مش على الطبيعه بجد
يعنى بيحلوا اى حاجه مهما كان مستواها عشان تليق بالاعلان عموما
الاعلانات بتاعه الملايات والبطاطين اللى تاخدى عليهم زيهم هديه دى عايزه بوست لوحدهااااا
انا بتشل اوووى منهم
ميرسى ليكى يا قمر ونورتينى :))
ولسة
رمضان داخل اهو واعلانات الزيت والسمنة هتهبلنا
ولا قناة اوسكار واعلانات التسوق المنزلى
بجد حاجة مستفذة وفى الغالب مابكملش اللى كنت بتفرج علييييييييييييه
reemaas
ااه صح
اعلانات رمضان دى بتبقى قصه تانيه خاااالص
لما نشوف هيعملوا فينا ايه السنادى
ميرسى ليكى يا قمر نورتينى :))
طب ما هو السؤال هنا هنتاكد ازاي؟؟؟
انما بقي لموضوع الاعلانات هو مفيش حل غير الريموت كنترول
بين الاعلان ده و الاعلان ده نروح قناه تانيه و هكذا دواليك
سبايدرمان
ماهو ده فعلا اللى بيحصل
فى اى بيت تلاقى الفاصل الاعلانى ده محطه عشان تشوف باقى القنوات شغال عليها ايه :D
ميرسى ليك جدا ونورتنى :))
سؤال وجيه فعلا وبيفرض نفسه
رأيى الشخصى انى مش هشترى منتج بعينه لان ثمنه هيروح للأعمال الخيرية إلا لو كنت محتاجاه فعلا
أما عن الأعمال الخيرية ففيه أماكن كتييير جدا ممكن اتبرع لها
موناليزا
صح اوووى رأيك
ميرسى ليكى جدا على تعليقك ونورتينى :))
انا من وجهة نظري انه الاعلانات في النهاية بزنس
وعالم البزنس شرس جداا جداا ولا يتعترف بالاعمال الخيرية الا لو كانت (تسويق) لمنتجه مش اكتر من كده وكمان بتبقى محسوبة بالمليم ها ندفع في الاعلان قد ايه وها نتبرع بكام وفرق المكسب كام..
بوست في الجون :)
انا Timo
واضطريت اعلق بغير معروف عشان بلوجر مش عاوزني اعلق باسمي...!!
Timo
حمدالله على السلامه :))
انا بردو شايفه ان صعب شركه تجاريه كل همها الربح المادى هتفكر فجأه انها تدى جزء للاعمال الخيريه
عشان كده مشكوك فيهم يعنى
نورتنى بعد طول غياب :))
بكررررررررررره الاعلانات
ابقا بتفرج علي البرنامج والمذيع والا المذيعة والضيوف مقطعين بعض والموضوع في غاية الاهمية
وتلاقي استوب فاصل ونواصل
ونلاقي الغنادير بيرقصوا ويغنوا لسمن ولا شامبو
ببقا عايزة اطخهم
شمس النهار
ده احنا المفروض نتفق عليهم كلنا ونتطخهم على اللى ببيعملوه فينا ده
ميرسى ليكى اوى نورتينى :))
بالنسبة لموضوع اننا من كتر الاعلانات اللى بنشوفها اصبحنا بنقتبس منها
النهاردة فى الشغل اليوم كان متأزم جداااا
والشغل كان جامد وكه مشدود و فى وسط كل ده والموقف متوتر جدا
كان زميلى بيسألنى عن برنامج فى الحسابات بتاعتنا
البرنامج ده؟!!!.....
قلتله: البرنامج ده بتاع موبينيل
مع هبه الجرحى
.... بالنسبة بقى للقنوات اللى بتفرض علينا اعلاناتها بطريقة غبية
اسوأها ميلودى واللى قررت بعد المسلسل متابعش حاجة تانى عليها
ده غير بانوراما اللى اكتشفنا مرة انها كانت جايبة نفس المدام فى اعلانين مختلفين واحد عن لحاف
و واحد عن كاسات وفى الاتنين طالعة تقول نفس الكلام وتزغرط بجد حاجة تعلى الضغط
مدونتك جميلة .... تحياتى
حنان
بنت سايكو
شَكلك شُوفتي إعلان شِبسي الجديد :DDD
الإعلانات دي حاجه لذيذه على فكره
بِتحفظ الأطفال - خاصةً - مبادِئ ذات هدف سامي
بِترغبهم فـ حب الحياه
بحب الحياه .. بحب كرستال .!
بِتدعو للتفائُل ..
خلي بُكره أحلى قُوم ..ده الشمس بتطلع كل يوم :D
" اعلان كوكا "
خاصَةً بقى اعلان شِبسيكو ..
اللي كنا بنطنطط أول مايجي ..
والست اللي بتقول فـالآخر
" طَرقع ! "
مَسخره بجد :DDD
..
لَو عملوا مُسابقة تسميع اعلانات
هَكون من أول المُشتركيين فيها .:DDDD
بنت سايكو
ماهو عشان الاعلانات مأثره علينا فا بنقول كده فى وسط الكلام اى جمله منها
ودى جمله من الراديو تخيلى التليفزيون بقى
اسوء قناه بجد فى الاعلانات هما قنوات بانوراما
مملين اوووى
بس نبهتينى والله على الست اللى طلعت مرتين دى
هابقى اخد بالى منها بعد كده
ميرسى ليكى يا قمر
نورتينى :))
حَـبآيـۃْ.بـטּـدۉڷ
اااه يا ساره صح
شوفته وعشان كده جاب فى دماغى الموضوع ده
هههههههههههههههههههههه
انتى مشكله بجد
شكلك مش بتقومى من قدام التليفزيون
دى انتى حفظاهم كلهم
منورانى يا قمر :))
والله معاك حق وفي رمضان بالذات موسم الإعلانات مش العبادة.. الله المستعان
كريمة سندي
فعلا ربنا يستر علينا فى رمضان
بيبقى العرض مكثقف من كل حاجه
ميرسى ليكى جدا :))
جميله جدا الفكرة اللى طرحتيها فى المقاله دى وعاوز اضيف حاجه ان تقريبا 99% من الاعلانات دى تحتوى على رسائل ضمنيه ليها تاثير مثل السحر على البشر بمعنى ان من غير ماتحسى هتلاقى نفسك او مش انتى تحديدا ابنك بنتك اخوكى ..... متاثر ولو حتى تاثير جزئى وعلى فكرة اغلب الرسائل الضمنيه مش بتتلاحظ الا مع التركيز لكن هى بتوصل من غير مانحس الموضوع اكبر من كده وانا للاسف مش عارف اشرحه بالصورة الكافيه
تقبلى مرورى
اسلام محمد
اسلام محمد
انا فاهمه اللى قصدك عليه جدا
اى حد فينا لازم فى اى وقت يكون اتاثر باعلان شافه
بحس انها شئ بيحصل فى عقلنا الباطن واحنا مش حاسسين
لدرجه اننا ممكن نفكر نجرب حاجه لمجرد ان الاعلان بتاعها بيعاد كتير مثلا او أثر علي عنينا وتفكيرنا
مبسوطه جدا برأيك ونورتنى :))
كلامك صحيح 100% يا بنوتة
فعلا أنا بنسى أنا كنت بتفرج على ايه و الاعلانات كتيرة لدرجة الخنقة
فوصلت لمرحلة إني بتفرج على 3 برامج في وقت واحد
كل ما يجي إعلان أحول ع البرنامج التاني
الخنقة بقه انك تلاقيهم كلهم مرة واحدة قلبوا إعلانات في وقت واحد D:
ساعتها أبسط حاجة أقفل التلفزيون و بلاها وجع دماغ
كمان الأطفال بيتأثروا بشدة بالاعلانات و بيقلدوها و يكرروها بدون وعي
لازم بصراحة يكون في حل لموضوع الاعلانات دا =(
مدونة متميزة
استمري و إلى الأمام
بالتوفيق
تحيتي لكِ =)
Sara
ايوه انا بيحصلى الموقف ده كتير
تحسى ان القنوات كلها اتفقت عليكى وجابوا اعلانات
اروح انا بقى متفرجه على حاجه غير كل اللى كنت بشوفهم دول :D
مفيش حل بيتهيالى للاعلانات دى
اصل دى ضريبه على كل حاجه بنشوفها
مفيش برنامج والا فيلم والا مسلسل مش برعايه حاجه معينه ليها اعلانات تخنق الواحد
ميرسى ليكى يا قمر
ونورتينى بزيارتك :))
Post a Comment