إنجاز

 

من فترة فاتت كانت امتحاناتي

كنت بذاكر بحب مش ضغط كنت ببحث وبدور وبساعد زمايلي

وكنت عارفة أني هعمل كويس وحصل

وجبت امتياز وبقيت رسميًا اخصائي تخاطب

مبسوطة من نفسي جدًا ومبسوطة بكل حاجة بحققها

كل اللي بفكر فيه أني أكمل في المجال اللي حبيته واللي لاقيت فيه جزء من شغفي

******

وقت ما استلمت شهاداتي كان فارق معايا جدًا

في ايدي نتيجة إنجازي طول الفترة اللي فاتت

بس اللي كان بيحسسني بإنجازي ده اكتر هو وجودك

يوم امتحاني بالظبط كنت بتحضرلي كل حاجة تساعدني أكون أهدى وأعرف أمتحن كويس

وكنت عارف اني هجيب امتياز وقولتلي مش هقبل بأقل من كدة

وقت ما خدت الشهادة  أنت أول حد شافها وأول حد أحتفل معايا بيها

صحتني من النوم على كيك وشمع وصور جميلة لشهاداتي

سعيدة أننا بنقدر نتبسط بأبسط حاجة وفي أي وقت

سعيدة بدعمك ليا وبتشجيعك إني أحقق اللي بحلم بيه دايمًا

ربنا يخليك ليا ❤

******

من فترة وأنا بتابع حالة بنت مع مامتها اونلاين لأنها في محافظة تانية

أول ما تواصلت معايا بعتتلي اختبار الذكاء بتاع البنت 

وانها متصنفة تأخر عقلي وأنا كنت متأكدة أنه غلط

اقترحت على الأم إنها تعيد الاختبار وضروري تتابع مع اخصائي قريب منها
عشان يلاحظ البنت بنفسه لأن ده شيء أساسي

كل المؤشرات والملاحظات كانت بتقول أن البنت حالتها أفضل بكتير من نتيجة اختبار الذكاء ده

أول ما البنت نجحت مامتها بعتتلي تفرحني وفرحتلها جدًا

النهاردة البنت عادت الاختبار تاني ورأيي كان صح 
الاختبار الأول غلط تمامًا والبنت نسبتها أفضل كتير

مامتها وهي بتشكرني انها سمعت كلامي ومشيت وراه وانه صح ده كان أكبر انجاز بالنسبة لي

وسعيدة جدًا حقيقي أن ده حصل لأن البنت كانت بتتعرض لضغط نفسي كبير

فأنا مبسوطة ليها الحمدالله

******

القراءة المستمرة بالنسبة لي إنجاز

عشان أنا كنت في وقت مابقدرش أكمل فيه حتى صفحتين في اليوم

فـ إني اخلص كتاب في جلسة واحدة ده كان بالنسبة لي مش سهل من فترة فاتت

في حد سألني أنتي عايشة للقراءة؟ 

قولتله لا بالعكس أنا بشتغل وبذاكر وبكتب وعندي بيت وولاد 

في وسط كل حاجة بتشغلني بعرف الاقي وقت أمارس هواياتي
لأن الهوايات دي مع الوقت بتبقى جزء مهم من نفسي وحياتي وتكويني وكياني.

******

الفترة اللي فاتت كنت بعتمد على كذا مصدر للقراءة ما بين الصوتي والالكتروني والورقي

الصوتي كان للوقت المهدور في يومي ما بين مطبخ أو ترويق أو غسيل 

والالكتروني بره البيت، والورقي قبل النوم أو في وسط اليوم في وقت روقان 
لكن من فترة بعدت شوية عن الصوتي وركزت مع الورقي

ومن بداية تحدي أبجد وأنا كنت مركزة في الالكتروني بشكل كامل 

ومن البداية مش هدفي خالص النقط 

عشان كدة كدة كنت عارفة أني هاقدر أجمع نقط ال3 شهور المجانية

أنا كان هدفي حاجة تانية خالص وهو اني اخلص قائمة كتب محدد عملتها قبل التحدي

كتب كانت في نيتي اقرأها لكن كنت متأخرة فيهم

فأنا كسبت 4 حاجات غير الشهور المجانية

كسبت استمراري في القراءة بمعدل يومي مش بيقل عن ساعتين

كسبت اني خلصت جزء كبير من قائمتي
كسبت اني اتعرفت على كتب واقلام جديدة مش في قائمتي أصلًا
وكسبت كمان كمية الميمز الرهيبة اللي كنا بنعملها عشان نتريق على اللي بيجروا في التحدي 😄

******

كنت لازم أي كتاب اقرأه في التحدي أكتب عنه ريفيو حتى لو صغير
عشان أكون بقرأ بتركيز مش مجرد صفحات وخلاص
ولذلك خلال الشهر ده وبسبب التحدي قدرت أكسب في مسابقتين كمان
كسبت منهم كتب وشهور مجانية تانية على أبجد.. فأنا مبسوطة 😍

******

بسبب المراجعات اللي بكتبها دائمًا في أكثر من حد طلب رأيي في كتبه وأكتب مراجعة

كنت ببقى مبسوطة بكدة جدًا وبكتب فعلًا رأيي بشفافية سواء سلبي أو ايجابي 

لكن أكثر حاجة فرحتني لما موقع متخصص في الكتابة تواصل معايا عشان أنقل مراجعاتي لموقعهم

ده حسسني قد أيه أن المراجعات دي مهمة وتستاهل تكون موجودة

ولأني عارفة قيمة المراجعات دي لكل كاتب بتكون مهمة إزاي وبيستناها

******

من الكتب المؤثرة معايا جدًا الفترة اللي فاتت كانت رواية سنوات الجري في المكان

فكرتني برواية خرائط التيه اللي فضلت متأثرة بيها لفترة

مراجعتي لسنوات الجري كانت حميمية جدًا مش مجرد رواية بقرأها وبقول رأيي فيها

لكن كانت رواية حسيت كل تفاصيلها 

وكانت متداخلة مع مواقف في حياتي طول قراءتهعا بشكل غريب

والمفاجأة أن جزء من مراجعتي  دي ظهر في لقاء مع الكاتبة نورا ناجي في قناة العربي

وده شيء متوقعتوش ومعرفتوش أصلًا إلا لما حصل وفرحني جدًااااا

فأنا بعتبر القراءة بالنسبة لي الفترة دي إنجاز مهم جدًا في حياتي

******

في بنت جميلة بشتغل معاها من كذا سنة

 أول ما اشتغلنا مع بعض قالتلي أنا بحب اقرأ مقالاتك جدًا

الفترة اللي فاتت كنت حاسة أني معنديش طاقة لكتابة المقالات والتركيز فيها زي قبل كدة

فجأة لاقيت البنت دي بتقولي أنتي دايمًا متألقة وشغلك متعوب عليه

حسيت إني خدت طاقة جديدة اكمل

شكرًا لكل شخص في حياتي بيحسسني إني انجازاتي فعلًا تستحق 

وشكرًا لنفسي إني قادرة ةعندي طاقة أحقق الإنجاز ده في المجالات اللي بحبها

واللي بتخليني أكتشف نفسي كل يوم بشكل جديد

readmore »»

صباح معطر بالذكرى

 في هذا الصباح ذهبت إلى منزل عائلتي.. 

ذهبت بخطى بطيئة إلى ركن محدد في المنزل 

مرت سنوات طويلة وهذا الركن مغلق تمامًا 

ولا يمكن أن يقترب منه أحد سواي

اليوم قررنا أن نُخرج كل الأشياء التي سنستغنى عنها قبل أن ننتقل إلى بيت أخر

ونترك هنا الذكريات والأمل والحلم والحب والدموع والحزن وسنوات العمر!

افتح اوراقي القديمة واضعها أمامي، تواجه حنيني

هنا كتبت أحلامي، ونقشت وجمعت الكثير من هواياتي 
هنا كتاباتي وأوراقي وكتبي

وهنا اسماء اصدقائي القدامى

وهنا أسماء أخرى لم أعد أتذكر تعود لمن

على الرغم من أنهم نعتوني بألقاب من المفترض أن تكون هي الأقرب 

مثل "حبيبتي.. صديقتي.. أختي"!

ولكن من قال أن الألقاب تلتصق بنا طوال العمر؟ من قال إنها تنبع من القلب؟

فتحت حقيبة صغيرة، لم أجد بها سوي زهرة ياسمين جافة ورائحة عطر ملئت الغرفة حولي

شعرت إنني عدت إلى عشرون عامًا ماضية

في تلك الحقيبة تُركت الهدية الأولى التي جائتني من معجب ما

ظللت ابحث لأيام طويلة عن هذا المحب المجهول حتى تعرفت عليه

واجهني يومها ولم ينطق بكلمة واحدة

ولكنني تعرفت عليه من رائحة عطره المميز الذي تعمد نثره في كل زوايا هداياه وأوراقه

وإلى اليوم لم استطيع أن أعرف اسمه

ولم اشتم العطر نفسه مرة أخرى، وكأنه صنع من أجله فقط.. ومن أجلي!

كنت صغيرة لم اتعدى الخامسة عشر عامًا وكان يكبرني بنحو اربع سنوات

نظراته كانت توحي بالحب، ولكنني كنت أصغر من أن أعي ذلك حينها

ظلت نظراته ترسل لي محبة تسع الكون، وعطره تربع داخل ذاكرتي وقلبي

ولا أعرف حتى الآن كيف احتفظ هذا العطر برحيقه طوال تلك السنوات وظل مختبئ هنا ينتظرني؟!

أم أن ذاكرتي هي التي تلاعبني لعبة الحنين المعتادة

 واستطاعت أن تعيد لي رائحة هذا العطر المميز بشكل افتراضي؟!

تركت الذكريات وعدت إلى الحاضر

لأجد في وسط دفاتري ورقة أخرى كان أرسلها لي المعجب ذو العطر المميز نفسه

وكتب لي فيها: "ستظلي أنتِ الحب الأول مهما مرت السنوات"
مع أمضاء باسمه للمرة الأولى والحرف الأول من اسمي بجانبه

كانت محبتة خالصة وخضراء زاهية 

لم استطيع أن استجيب لها وافهمها بالقدر الكافي في هذا العمر الصغير

اسماني ياسمين على الرغم من أنه لم يكن اسمي

ولكنه وصفني بالنقاء كـ لونها، فأحببت الاسم وربما أحببته!

بعد هذا الصباح وفي صباح أخر.. رأيته! 

وكأن زهرته وعطره ورسائله كانوا نداء حتى يلبي القدر لقائنا!

لم تتغير ملامحه، ولا يمكن التوقع مطلقًا أن هذا الشخص نفسه يقترب عمره من الأربعين
فيبدو أن قلبه المحب الزاهي كان سبب لتبقى ملامحه نقية كما هي
وكأن العمر لم يمر فوقها.

نظر إلىّ دون أن ينطق بكلمة واحدة

ونظر إلى أطفالي الذين كانوا يلعبون أمامي.. وأبتسم

علمت أنه لم يتزوج حتى الآن

وكأنه يرسل إلىّ رسالة خفية أنني مازلت الحب الأول بقلبه.. وربما الأخير!

 وأن عطره الباقي في خزانتي منذ سنوات طويلة كان قطعة محبة مجسدة من قلبه

لا يمكن أن تنضب رائحتها أبدًا.

readmore »»

رسائل ربنا ❤

أنا مقتنعة جدًااا برسايل ربنا
ربنا اداني نعمة كبيرة اني اقدر اشوف رسايلي
في كلمة في صورة في مكالمة في موقف
كل مرة كنت بقول فيها يارب، يارب عرفني الصح فين
ماكنش بيمر وقت يُذكر إلا وبلاقي رسالتي وصلالي زي ما ربنا عايزها بالظبط

وتعرفني أني صح فعلًا

فاكرة أني في مرة قبل ما أنام قولت على حاجة معينة يارب بلاش ده

عشان أصحى تاني يوم على تليفون فيه بالظبط كل اللي دعيت ربنا بيه

وبتخطيطه وترتيبه هو بدون أي تدخل مني

ويمكن أحسن مما دعيت كمان

******

من فترة كتبت على الفيس اني بشوف كتير جدًا بالصدفة صور عليها
"ولسوف يعطيك ربك فترضى"

وبقيت مقتنعة أن دي رسالة ربنا ليا فعلًا

من قريب صديقة قالتلي اقرأي سورة معينة من القرآن قبل ما تنامي
قرأتها ونمت، وصحيت تاني يوم "ولسوف يعطيك ربك فترضى" بتتردد في ودني

عشان بعدها بثواني افتح الانستجرام الاقي حد بقاله سنة مبعتليش أي رسالة
بعتلي فيديو فيه السورة دي تحديدًا

شكرًا يارب على كل حاجة حلوة بتحصل
وشكرًا على كل رسالة بتبعتهالي تطمني

والأهم شكرًا أني قادرة اقرأ وأشوف رسايلي وافهمها

******

احلامي من ضمن رسايلي ويمكن أهمها

عشان كل مرة بقول لا يمكن يكون مش صح يمكن يكون مجرد حلم

بيطلع هو اللي صح وأنا اللي غلط

احلامي من ضمن رسايلي لدرجة أني أوقات بخاف منها

وأوقات كتير بتغيير مودي كمان وبتخليني مضايقة

عشان بكون عارفة أن اللي فيها حقيقي سواء حصل أو هيحصل

وأوقات بتخليني مبسوطة عشان بتقولي أن في خير جاي

******

 

الفترة دي في بوستات كتير بتتكلم عن مصطفى حسنى

وأنه قد أيه رحيم وسلس في تعليمه للدين وبطريقة مبسطة وتحبب اللي قدامه في الطاعة

كتير ببقى عايزة أكتب عن تأثير مصطفى حسني تحديدًا فيا

من زمان وأنا بحب أشوف برامجه واسمعه وحضرتله مرة ندوة

لكن في الكام سنة اللي فاتوا مصطفى حسنى بالنسبة لي مبقاش مجرد داعية

أو حتى شيخ اسمعه وافهم منه اللي مش فاهمها في الدين

لكنه كان من ضمن اللي ربنا بعته ليا عشان يهون عليا الصعب

كأنه كان أخ بكل ما في الكلمة من دعم وقرب ومحبة

كلامه كان حنين جدًا عن فكرة فقد الأهل وإزاي هما حاسين بينا

وإزاي أن من حقنا نزعل عليهم قوي لدرجة الألم الداخلي اللي بنحسه ده

وكان دايمًا بيقول كلام بيهون عليا كتير وأدعية بتريح قلبي

حتى أني كنت بحتفظ بفيديوهات كتير ليه برجعلها كل شوية

في فترة ما أنا كنت عايشة تقريبًا على الأكونت بتاعة وبشوف كل الفيديوهات واللايف

ودلوقتي كل ما بيكون في موضوع معين في دماغي

سبحان الله بلاقي بالصدفة قدامي فيديو بيتكلم هو فيه عن نفس النقطة دي

ربنا يجعل كل عمله في ميزان حسناته

وكل مرة كلامه ليا أو لغيري هون الوجع أو قرب قلبنا من الطاعة أكتر في ميزان حسناته

******

ربنا الفترة دي مديني راحة نفسية كبيرة أوي بحمده عليها

وهي أهم شيء بالنسبة لي

بيخليني مزعلش على أي حاجة بتروح مهما كانت

بقبل كل الخطط اللي بيرسمها لي عشان عارفة إنها هي الأفضل ليا

محيطي هادي وجميل وبيساعدني انجز واحقق كل اللي بحلم بيه ودي نعمة كبيرة

قلبي راضي وبيحب وبيهون على نفسه أي شيء

كل ما عقلي بيخوفني أو قلبي بيوجعني من أي ذكرى

بلاقي في نفس اللحظة موقف يقولي لا فوقي 

متستسلميش للشيطان اللي عايز يضيع عليكي اللحظات الحلوة اللي انتي عايشاها دلوقتي

فالحمدالله دائمًا وابدًا

******

بقالي كذا سنة رمضان بيكون شهر مؤلم جدًا بالنسبة لي

وده كان سايب شعور جوايا أنا مش حاباه أبدًا

لكن السنادي الوضع مختلف تمامًا الحمدالله

هادي وسلس وحنين أوي على قلبي

ربنا مطمن قلبي وبيهون عليا الفقد

وأنا قادرة التزم بوردي وفروضي بشكل أكبر بكتير

وده كله بيخليني راضية وهادية ومرتاحة أكتر

ربنا يديمها نعمة

وربنا يديم رسايلة الجميلة ليا

ويديم نعمة القدرة على قراءة الرسايل دي

readmore »»

عن أثر المدونة والكتابة 💙

 

لما بقلب في المدونة هنا من سنين كتيرة فاتت بلاقي حياتي كلها هنا

تفاصيل كتير اوي مريت بيها، حزن وفرح ونجاح وذكريات وتفاصيل

فضفضة كانت من القلب أوي ومن غير أي رتوش

جنان خام مش عارفة كانت الناس مستحملاه ازاي 😤

تفاصيل كتير بحبها اتكلمت عنها لسة موجودة، وتفاصيل تانية اختفت

ناس كتير فضلوا قريبين وناس تانية اختفت وناس جديدة قربت
لما بقرأ كل بوست بفتكر الموقف اللي كتبته فيه بتفاصيله
بفتكر كنت بتكلم عن مين في كل حاجة كتبتها حتى لو ماذكرتش أسامي
لكني فاكرة.. وهفضل فاكره
وممتنة جدًا للحياة الحلوة اللي عشتها واللي دونتها هنا عشان افتكرها دايمًا

حياة اختلفت فيها حاجات كتير
 لكن بالرغم من ده في جزء من روحي لسة زي ما هو وجزء تاني اختلف

كل اللي بمر بيه ساب بصمة ملحوظة عليا أنا نفسي شايفاها

ولسة هعمل ذكريات تاني وهكتب هنا ويارب ماوقفش أبدًا عن ده

عشان أنا كل ما بقرأ اللي كتبته زمان بكون مبسوطة وفي بسمة على وشي

بتعرفني أن عشت حياة سعيدة بكل تفاصيلها مهما كنت شوفتها وقتها حزينة

لكن الحمدالله على كل حاجة حلوة الواحد مر بيها وكل حاجة بتوجع أتعلم منها.

****

الحقيقة أني متفاجأة من أني رجعت اكتب هنا بانتظام إلى حد ما

أنا بصحى الاقي حاجة في دماغي عايزة اكتبها بدخل هنا
بسيب أكتر من مسودة لأكتر من فكرة أو خاطر في دماغي
 مبفكرش أنا بكتب ليه ولمين

عارفة أني بكتب لنفسي وده سبب كافي جدًا وهو السبب الأهم

 وده نفس اللي كنت بعمله زمان هنا (فيارب دماغ وشوية من فراغ زمان 😃)

بكتب عشان أفكر نفسي أن زي ما عدى الوحش فأي وحش هيعدي وهيجي الحلو

"كل مر سيمر"

بكتب عشان الحلو يستاهل جدًا يتوثق

وافكاري مهما كانت مكركبة تستاهل تتوثق

عشان لما أرتب الكركبة دي أكون ممتنة لنفسي.

****

مفتقدة زحمة البلوج بتاعة زمان مش عشان حد يتابعني أو كومنتات

لكن عشان كان في هنا حياة بكل معنى الكلمة وناس كتير أنت عايش معاهم تفاصيلهم

وحشتني الحياة اللي كانت هنا.

*****

عمري ما اعتبرت الفيس بوك من أول ما ظهر بديل عن المدونة

لأني معظم اللي بكتبه هنا مش هفكر أبدًا أكتبه هناك

هنا المخبأ السري بتاعي، اللي بحبه وبفضفض فيه زي ما أنا عايزة

وكل الكلام عن المدونة ده فكرني لما كنت بعملها عيد ميلاد زمان

بيتهيألي أنه كان في شهر 3 من كل سنة بحتفل بوجود البلوج مساحتي السرية الصغيرة 

شباب بقى ما احنا كنا شباب 😄

*****

الفترة دي بيوصلني ريفيوهات كتير عن أخر كتاب ليا وكمان كتبي القديمة
اللهم لك الحمد دائمًا وأبدًا

لكن أكتر ريفيو أنا حقيقي طايرة من الفرحة بيه كان مفاجئ وغير متوقع من الكاتبة نورا ناجي

اللي بعتتلي رسالة تقولي أنا قرأت بريق باهت ومبسوطة بيكي أوي

حقيقي كنت بتنطط من الفرحة حرفيًا
 لأني حتى ماكنتش أعرف أنها مهتمة بالكتاب وجابته
 رأيها فرق معايا جدًاااا وقولتلها كدة

شكرًا للناس اللي بتوزع محبة ونقاء

شكرًا للناس اللي بتدينا دافع نكمل من غير ما يحسوا

شكرًا لكل حاجة حلوة وعوض ربنا ورسائله اللي بتقولي كملي انتي تستاهلي حاجات حلوة كتير

*****

معرض الكتاب السنادي كان مبهج بشكل مش معقول، وكنت مبسوطة بيه أوي
نزلته أكتر من مرة وشوفت ناس كتير
منهم اللي افتكرت اتصور معاهم ومنهم اللي نسيت من كتر ما الكلام اخدنا
قابلت ناس بقالي سنين ماشوفتهمش
قابلت ناس أول مرة أشوفهم
حتى لما كنت بلف لوحدي كنت ببقى مبسوطة
نزلت مع مازن كالعادة وجبنا كتب حلوة لينا كلنا
حضرت لقاء ونس الكتب اللي كان يوم مليان بالمحبة واللطف والكتب
الذكريات والروح دي كانت وحشاني جدًا وكنت مفتقداهم السنتين اللي فاتوا
فيارب يديم كل اللحظات الحلوة دي على طول

*****

من فترة صحيت في يوم لاقيت رسالة من صديق عزيز في مجال الكتابة
كان بيقولي أنه في أسلوب معين في الكتابة كان شايف أن الجملة مش هتمشي بيه
لكن مرة قرأ لي مجموعة قصصية وكنت بكتب بالأسلوب ده
وشاف أن الموضوع كويس أهو وسلس في القراءة ومفيش مشكلة
ومن وقتها وهو اتبع الطريقة دي وبيكتب بيها في كل شغله والموضوع تمام
وفكر أنه واجب يبعتلي يشكرني على النقطة دي
فرحت جدًا بالرسالة دي وشكرته وقولته أنه صنع يومي وقتها فعلًا
الكتابة طاقة نور وإحنا بنكتب لعلنا نحدث أثرًا في الوقت الحالي
 أو حتى نترك أثر طيب بعد ما نمشي
رسالته دي حسستني أني تركت أثر حقيقي قبل ما أمشي حتى لو بسيط

*****

نفس الصديق لما قرأ أخر حاجة بكتبها قالي أنا صقفت
واتمنى أرجع بحاجة بنفس القوة دي
وده بالنسبة لي كلام عظيم جدًا جدًا فوق الوصف
وسبب في سعادة مقدرتش احددها بكلام
أنا ممتنة جدًا للقلوب الطيبة اللي بتقدر تقدم دعم ومحبة خالصة واقتراحات كمان عشان تكون أحسن

*****

صديقة عزيزة جدًا من قريب سألتني.. مبسوطة إنك رجعتي تكتبي؟

قولتلها أنا مبطلتش كتابة بصورة أو باخرى، لكن كنت بكتب لنفسي

قالتلي أنا مش عايزاكي تكتبي لنفسك بس تاني أكتبي وانشري اللي بتكتبيه

نفس الصديقة قالتلي كتابتك حلوة ومفرداتك قوية

وده رأي أنا بعتز بيه جدًاااا وبيدعمني وبيقويني إني أكمل

*****

كل كلمة بتتقالي بحفظها في دماغي وعمري ما بنساها
عشان لو نسيت دماغي هتقولي فوقي يادينا وافتكري كل كلمة اتقالت ليكي
عشان أكون دايمًا مقدرة الأشخاص الطيبين اللي ربنا بيبعتهم في طريقي

*****

الفترة دي بكتب مراجعات كتير للكتب اللي بقرأها واللي عددها زاد الحمدالله

أكتر من رسالة وصلتني من أصدقاء ليا إني كنت سبب في أنهم يرجعوا يقرأو ويشتركوا في تطبيقات للكتب

كنت سعيدة جدًا جدًا إني سبب في أن حد يرجع يقرأ تاني
عشان ده من ضمن الأثر اللي الواحد بيحاول يسيبه

ولأني كنت محتاجة الدعم ده والدفعة دي في فترة ما في حياتي، فعارفة هي قد أيه بتفرق

*****

لما بكتب تحديدًا مشروع أدبي بحضر له
بحس أن في روح جوايا هي اللي بتطلع
أوقات بخلص اللي بكتبه وبقعد أقرأ واراجع وأقول هو أنا كتبت ده إزاي؟
في كل كتاب خلصته توقعت أني بعده مش هعرف أكتب تاني
كنت بخلصه وأنا مستنزفة حرفيًا من جوايا
وكأني خلصت كل الثقل اللي كان بيملاني.. فبقيت أخف
لكن الروح بترجع تتملي تاني بتفاصيل ومواقف ومشاعر محتاجة تخرج
فبيرجع الحلم يبدأ من أول وجديد
عندي حلم جديد مهم جدًا بالنسبة ليا
كان مستحوذ عليا بقاله سنين ودلوقتي بس قرر يخرج ويكمل
فياااارب كمله على خير واكتبله يشوف النور

*****

قارئي الأول والأهم
مهما كنت بسمع من أراء كويسة فهيفضل رأيك هو الأقرب لقلبي
كل حاجة كنت بكتبها كنت بتبقى أنت أول حد يقرأها
كنت بتبقى ناقد قاسي عشان تخليني أحسن
بالرغم من أنك مشغول لكن قدرت تلاقي وقت عشان تقرأ اللي بكتبه
أنك تقولي اني شاطرة وتطورت كتير وانك مبسوط بيا
فـ دي اكتر حاجة فرحتني في كل اللي اتقالي عن شغلي ده
أنا ممتنة ليك ولحبك ووقتك واهتمامك 💙

readmore »»

عيد ميلاد

 

دايمًا شايفة أن الذكريات مهمة أوي في حياتنا

هي اللي بتخلينا شايفين كل سنين عمرنا اللي فات في شكل صور في عقلنا

حتى لو مش صور بالمعنى الحرفي المعروف

على الرغم من إنها بتخلينا نشوف أننا كنا في أوقات مبسوطين من قلبنا حقيقي

لكن في الوقت نفسه مع كل فقد بترجع الذكريات دي عشان توجعنا حتى لو في البداية بس

وبعد كدة بنرجع نشوفها بنفس الفكرة الأولى وإنها كانت وقت جميل قضيناه مع الناس اللي بنحبهم

وهي دي الذكريات والسيرة الحلوة اللي بيسبوها لينا عشان تصبرنا

أعتقد أني من بعد وفاة ماما بقيت بشوف كل حاجة بنظرة مختلفة

ومنها فكرة الذكريات

الفترة اللي فاتت دايمًا بفتكر موقفين تحديدًا مع حمايا

الموقف الأول بعد ما اتجوزت بشهر ونص تقريبا كان عيد ميلاد حمايا

خدنا تورته وروحنا ليهم وكنت واقفه في المطبخ بقطع التورته بعد ما هيصنا شوية

سمعته بيقول "البت دي جدعة أوي"

سمعتها رغم أنه مقصدش يسمعهالي وأنا عمري ما نسيت الكلمة دي

مرت مواقف كتير طول العشر سنين اللي فضلت فيهم موجودة في البيت ده

مواقف عرفتني أنه بيحبني وبيقدرني وبيعاملني أني بنته فعلًا

وعشان كدة أنا شايفة أن المواقف الأولى دايمًا بتدوم

الموقف التاني كان قبل وفاته بشهر بالظبط كان أخر عيد ميلاد له

جوزي اقترح عليا أني اعمله تورتة عيد ميلاده بنفسي وأنا حبيت الفكرة فقولتله يلا بينا

وفعلًا أخترنا شكل التورتة وبدأنا نجهز فيها ونعملها مع بعض

وخدناها وروحنا، حمايا مكنش يعرف أننا هنعمل كدة

أول ما شافها اتبسط رغم أنه كان تعبان، وقالي "ربنا يباركلك يابنتي وكل سنة وأنتم طيبين"
فـ لتاني مرة مش هنسى أبدًا الكلمة دي واللي قالهالي المرة دي عشان اسمعها

برغم كل الوجع والفقد لكن أنا مبسوطة أننا قدرنا نعمل كدة 

وإحنا مش كنا عارفين أنه أخر عيد ميلاد له

الحمدالله أنه كان مميز ومختلف وكلنا اتجمعنا فيه

وأني من أول ما دخلت البيت ده كنا بحتفل بيه ومعاه ومش قطعنا ولا مرة العادة دي

يارب يكون عيده في الجنه دايمًا أجمل ويكون مرتاح في مكانه اللهم آمين

readmore »»