27 June 2011

27/6.... ChallengE ....

.




لما واحد بيدخل منافسه
مش بيدخل منافسه عشان يثبت لنفسه انه كويس اوى وشاطر
لكن بيدخلها عشان يثبت لنفسه وللى حواليه
انه افضل من اللى بينافسهم تحديداً

التنافس بيخلق روح التحدى جوه اى حد فينا
بس بحس انه تحدى مؤقت
عشان بتتنافس فا انت هتتحدى اللى بتنافسهم دول
بس بعد ما المنافسه دى تخلص
التحدى اللى جواك هيقل
واحتمال كبير يختفى
ادام اتولد مع المنافسه دى بالذات

الكلام ده بيفكرى بايام المدرسه
لما يفضل طالب يطلع الاول دايما
ومفيش معاه اى حد بينافسه
هيجى عليه وقت ويزهق ومش هيبقى عنده روح التحدى
فا انه دايما يذاكر عشان يطلع الاول
هيقول بينه وبين نفسه
ما انا دايما الاول
هتفرق ايه بقى

بالظبط ده فى حياتنا كلنا على اختلاف المستويات
فى الدراسه وفى الشغل وفى حياتنا عموما
المشكله ان المنافسه دى ممكن تقلب بشكل تانى
وهو الغيره
الغيره من اللى حواليك لانهم مثلا بيتخطوك فى اى منافسه
فى غيره كويسه هتوصلك للاحسن
وفى غيره هتوصلك للاسوء
غيره هترجعك لورا 
وانك مش قادر تبقى فى حجم اللى بتنافسهم
وهتبقى دايما حاططهم قدام عينيك
وعايز تبقى زيهم
مش تبقى نفسك
ولما ماتعرفش تبقى زيهم
ولا تبقى نفسك
هتبقى حد ماتعرفوش اصلا
ودى اكتر حاجه بتوجع

21 comments

تايه said...

nice post
my regards

Bent Men ElZaman Da !! said...

ميرسى ليك جدا على تعليقك
ونورتنى :))

Tarkieb said...

عندك حق وده اللي الاهلي عمله ساب الزمالك يفرح شوية بالقمة وبعد كده شد حيله...وجابه لمركزه بتاع زمان....صحيح الواحد مابيعرفش يلعب لوحده لازم حد قصاده بس لازم يكسب لو لعب...جميل فكرتك اوووي

مصطفى سيف said...

دايما ده اللي بيتزرع جوانا من الصغر
يقولك بص لابن الجيران بيذاكر ازاي يلا اعمل زيه علشان ميجبش مجموع اكبر منك
وفي حصة الالعاب يقولك اوعى تخلي الفريق التاني يجيب جول
اللي بيتزرع جوة الطفل وقتها مش اني افوز او اكسب بس لا بيتزرع جواه حقد على المنافسين ويفكر ازاي يخسرهم و الحقد بيكبر جواه لحد ما يشتغل يتحول على زمايله
وقها مش هيبقى نفسه ولا غيره
والسبب هو تربية غلط
تحياتي

كريمة سندي said...

اتفق معك غاليتي فالمنافسة الشريفة لابد لها من أطراف مشاركين حتى لا نصل إلى اليأس والإحباط

Casper said...

المنافسة لن تنتهي هكذا هو حال الدنيا

_________

خالص تقديري لفكرك وقلمك
تقبلي مروري

Casper

Bent Men ElZaman Da !! said...

Tarkieb

اكيد طبعا
مالهاش طعم اى مسابقه من غير منافسه
ميرسى ليك جدا
ونورتنى بزيارتك :))

Bent Men ElZaman Da !! said...

مصطفى سيف

والله صح بردو يا دكتور
احنا من صغرنا ودايما لازم نحط الناس قدام عنينا
مين الافضل عشان نبقى احسن منه
مش تحدى نابع من جوانا من غير اى مؤثرات خارجيه

ميرسى ليك على رأيك ومنورنى دايما :))

Bent Men ElZaman Da !! said...

كريمة سندي

معاكى حق جدااا

ميرسى ليكى ونورتينى :))

Bent Men ElZaman Da !! said...

Casper

فعلا
حياتنا كلها منافسات
ميرسى ليك جدا :))

Anonymous said...

أنا بحب أي حاجه فيها منافسه بتخلق جوا الواحد تحدي و تطلع منه أحسن ما عنده لكن الغيره مش نتيجه صحيه للمنافسه.
تحياتي ليكي

شيرين سامي

iـــــــــــsــــــــــlــــــــــــaـــــــــm said...

المنافسه جميله بس الاجمل الطموح
مش شرط منافسه مع حد معين بس ان الحياه تبقى اهداف وكل هدف بيخلق هدف جديد
هو ده اللى المفروض نتربى عليه من صغرنا
لكن منافسه لمجرد انى ابقى احسن من اشخاص
طيب وبعد ما ابقى احسن منهم ؟؟؟


الموضوع اللى بتطرحيه جميل ومناقشته مهمه
تحياتى

زهرة الضحا said...

روح المنافسه دي لما الواحد بيفقدها بيحس انه معندوش هدف سواء كان اكبر من المنافسه و مستواه اعلي أو يكون حاسس انه مش قد المنافسه و مش عارف يخوض التجربه و دايما كده بيحس بالنقص

و اهم نوع من المنافسه هي منافسة الذات
و تحدي النفس علي النجاح و الثبات عليف في مختلف الظروف
يارب اوعدنا نكون من الناس دي

تحياتي ليكي علي مناقشة الموضوع ده

Bent Men ElZaman Da !! said...

شيرين سامي

الغيره فعلا اللى بتقتل روح المنافسه وبتخلق بدل منها الحقد والحسد

ميرسى ليكى اوى :))

Bent Men ElZaman Da !! said...

iـــــــsــــــlــــــــaـــــــm

ماهو بعد ما تبقى احسن منهم التحدى هيقل عشان هدفك وصلتله خلاص
فى المنافسه بالذات الهدف بيبقى انى ابقى احسن من اللى بنافسهم
الموضوع كله فى التربيه فعلا

ميرسى ليك جدا وسعيده اوى بزيارتك :))

reemaas said...

احساس حلو اوى لما يكون ليك ند فى حاجة معينة تتنافسوا وتطلعوا احلى ماعندكم التفوق بعد كده نسبى

زهرة الضحا said...

الحيام من غير منافسه بتبقي حياه بدون هدف
سواء كان الشخص اكبر من المنافسه وهو دايما شاطر او مش قادر يدخل المنافسه علشان حاسس انه اقل من انوا يدخل فيها
و اهم منافسه هي المنافسه و التحدي مع الذات
و دي بتبقي اصعب
يارب اوعدنا نقدر نتحدي نفسنا علي النجاح و الثبات

تحياتي ليكي علي الموضوع ده

Bent Men ElZaman Da !! said...

زهرة الضحا

انا معاكى جد فى كلامك
اجمل شئ منافسه النفس
لانها مش بتقف على حد
انا بنفسى اللى بتحدى نفسى

ميرسى ليكى جدا ونورتينى بزيارتك :))

Bent Men ElZaman Da !! said...

reemaas

ماهو وجود ند ده اللى بيدى دايما احساس انك عايز تبقى احسن

ميرسى ليكى يا قمر منورانى :))

Sara said...

أقولك على سر ؟

مش بحب المنافسات ^^"

بحس إنها بتخلق نوع من التنافس الغير شريف و الغيرة القاتلة في مجتمعنا

أنا بحب الهدوء و السلام

بس ما يمنعش إني بحب أنافس نفسي و أتفوق عليها :)

Bent Men ElZman Da !! said...

Sara

انا بردو زيك بحب الهدوء ده
بحس ان المنافسات بتخلق نوع من التوتر اصلا جوه كل واحد
بس بردو الواحد من وقت للتانى بيبقى عايز دفعه وتشجيع كده مش بيلاقيه الا فى التنافس :)

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget